ნეტგაზეთი • RU

ჩინეთის სახელმწიფო კომპანიები რუსეთს ომში ეხმარებიან – ბლუმბერგი

აშშ-ის პრეზიდენტის, ჯო ბაიდენის ადმინისტრაციამ ჩინეთის მთავრობას მტკიცებულება წარუდგინა იმის შესახებ, რომ ზოგიერთი ჩინური სახელმწიფო კომპანია შესაძლოა ეხმარებოდეს რუსეთს სამხედრო მოქმედებებისას უკრაინაში – ამის შესახებ Bloomberg-ი ანონიმურ წყაროებზე დაყრდნობით წერს. აშშ ცდილობს გაარკვიოს, იცის თუ არა პეკინმა ამის შესახებ.

გაურკვეველია, კონკრეტულად რაში გამოიხატება დახმარება, თუმცა ზოგადი ცნობებით საქმე ეხება სამხედრო-ეკონომიკურ (თუმცა არა იარაღით) დახმარებას. ეს დახმარება, აშშ-ს განმარტებით, არ იძლევა საშუალებას, რომ რუსეთმა სრულად აარიდოს თავი აშშ-სა და მისი მოკავშირეების მიერ დაწესებულ სანქციებს.

Bloomberg-ის წყაროები მიიჩნევენ, რომ ჩინური კომპანიები შეგნებულად ეხმარებიან რუსეთს სამხედრო მოქმედებებში.

ჩინეთის პრეზიდენტი სი ძინპინი თავს არიდებს რუსეთის კრიტიკას ომის გამო, თუმცა მზადყოფნას გამოთქვამს, მონაწილეობა მიიღოს სამშვიდობო მოლაპარაკებებში. სი ძინპინი კონფლიქტში ბირთვული იარაღის გამოყენების წინააღმდეგია.

„თუ ნათელი გახდება, რომ ჩინეთის სახელმწიფო კომპანიებმა მართლაც დაუჭირეს მხარი რუსეთის უკრაინაში შეჭრას, ეს უზარმაზარ გავლენას მოახდენს აშშ-ს პოლიტიკაზე, როგორც რუსეთის, ასევე ჩინეთის მიმართ.

აშშ-ს სტრატეგია უკრაინის მიმართ, სხვა საკითხებთან ერთად, პუტინის ხელისუფლების იზოლაცია და მისი ეკონომიკის ჩამოშლაა.

ჩინეთი მსოფლიოში მეორე უმსხვილესი ეკონომიკის ქვეყანაა, მისმა მხარდაჭერამ კი რუსეთის მიმართ აშშ-ს სტრატეგია შესაძლოა მნიშვნელოვნად შეარყიოს“, – წერს Blumberg-ი.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com