მთავარი,სიახლეები

ბათუმში ბანკიდან 3.5 მილიონი ლარი მოიპარეს

28.05.2021 • 17385
ბათუმში ბანკიდან 3.5 მილიონი ლარი მოიპარეს

„ლიბერთი ბანკის“ ბათუმის ფილიალის ყოფილ მენეჯერს და კიდევ 14 თანამშრომელს სასამართლოში უჩივიან. მიზეზი მილიონობით თანხის დაკარგვაა. „ლიბერთი ბანკი“ ბათუმის საქალაქო სასამართლოში იმ თანამშრომლებს ედავება, ვისთანაც შრომითი ხელშეკრულებები უკვე შეაჩერა. საქმეს მოსამართლე სალიხ შაინიძე განიხილავს.

საქმის მასალების მიხედვით, ბანკიდან 2 მილიონ 533 ათასი ლარი, 202 ათასი ამერიკული დოლარი და 80 ათასი ევროა დაკარგული. სხვადასხვა ტრანზაქციით 37 პირის ანაბრიდან და პირადი ანგარიშიდან თანხას 2015 წლიდან ითვისებდნენ.

სასამართლოში საქმის განხილვის დაწყებამდე „ლიბერთი ბანკის“ ადმინისტრაციას  ახსნა-განმარტება მიაწოდა ბანკის ბათუმის ფილიალის ყოფილმა მენეჯერმა და თქვა, რომ თანხის მითვისება ხელშეკრულებების გაყალბების გზით მოხერხდა, ასევე გაყალბებული შემნახველი ანგარიშების შექმნით. მას ჯერ სასამართლოსთვის ჩვენება არ მიუცია.

„ბათუმელების“ ინფორმაციით, თანხა ძირითადად ბანკის ფილიალის ყოფილმა მენეჯერმა მიითვისა, რომელიც აზარტული თამაშებით იყო გატაცებული. თუმცა საქმის მასალებში, რომელსაც ჩვენ გავეცანით, ამის შესახებ არაფერი წერია.

ბანკი ითხოვს, რომ დაკარგული თანხა თანამშრომლებს დაეკისროთ, რადგან მიაჩნია, რომ ამ თანამშრომლების არასწორი მოქმედებების შედეგად დაკარგა ბანკმა მილიონები.

„ბათუმელები“ მეტი დეტალის გასარკვევად „ლიბერთი ბანკს“ დაუკავშირდა, სადაც მხოლოდ ეს გვიპასუხეს წერილობით:

„საქმე მოკვლევისთვის და გამოძიებისთვის გადაცემულია სამართალდამცავ ორგანოებზე. ბანკი სრულად თანამშრომლობს საგამოძიებო ორგანოებთან. ბანკის ყველა ფილიალი სრულად ფუნქციონირებს, შეზღუდვების გარეშე. ჩვენი კლიენტების თანხები დაცულია და საფრთხე არ ემუქრება,“ – მოგვწერეს „ლიბერთი ბანკის“ პრესცენტრიდან.

აქ ვერ გვითხრეს, დაწყებულია თუ არა გამოძიება „ბანკიდან მილიონების დაკარგვის საქმეზე“.

სასამართლოში სამოქალაქო საქმის განხილვის პარალელურად, დაწყებულია თუ არა გამოძიება – ინფორმაცია ამ დრომდე ვერ მოგვაწოდეს შინაგან საქმეთა სამინისტროში.

გადაბეჭდვის წესი


ასევე: