ქრისტიანული ეკლესიების დიდი ნაწილი დღეს, 25 დეკემბერს იესო ქრისტეს შობას ზეიმობს. საზეიმო ღვთისმსახურება ბათუმის კათოლიკურ და პროტესტანტულ ეკლესიებში 24 დეკემბერს, ღამით დაიწყო. ქართული მართლმადიდებელი ეკლესია კი ქრისტეშობას ძველი სტილით, 7 იანვარს აღნიშნავს.
კათოლიკური ეკლესიის წინამძღვრის გაბრიელ ბრაგანტინის თქმით, წლევანდელი შობის ზეიმი განსაკუთრებულია:
„რომის პაპის მიერ ეს წელიწადი გამოცხადდა გულმოწყალების წლად. ჩვენ ყველაფერი უნდა გავაკეთონ გაჭირვებული ადამიანებისთვის, თუმცა პირველ რიგში უნდა ვიფიქროთ ღმერთზე, რადგან მოწყალება თვითონ ღმერთია“-აღნიშნა პადრემ.
შობის ღამეს კათოლიკურ ეკლესაში ორი ბავშვი მოინათლა, წირვის შემდეგ კი გაიმართა საშობაო ტრაპეზი.
ევანგელური მიმდინარეობის ექვსმა ეკლესიამ, ბათუმში, ქრისტეშობის დღე ერთად აღნიშნა. საზეიმო მსახურება წმინდა სამების პროტესტანტულ ეკლესიაში საღამოს ათ საათზე დაიწყო. მსახურების შემდეგ გაიმართა საშობაო კონცერტი. მოზარდებმა წარმოადგინეს პერფორმანსი.
სადღესასწაულო წირვაზე არცერთ ეკლესიაში, ხელისუფლების წარმომადგენლები არ გამოჩენილან.
