5 აპრილის დილის [11 სთ] მონაცემებით საქართველოში კორონავირუსით სულ 170 ადამიანია ინფიცირებული, გამოჯანმრთელდა 36 პირი, 2 ადამიანი კი გარდაიცვალა.
ბათუმში კორონავირუსის ახალი შემთხვევა დადასტურდა – ამის შესახებ დღეს, 5 აპრილს, აჭარის ჯანდაცვის მინისტრის მოადგილემ, ნინო ნიჟარაძემ განაცხადა.
„დღეს დილით დაგვემატა ახალი დადასტურებული შემთხვევა, რომელიც გახლავთ ერთ-ერთი პაციენტის კონტაქტირებული პირი და რომელიც იმყოფებოდა საკარანტინე სივრცეში. ეს არის 80 წლამდე პირი, რომელსაც მსუბუქი რესპირაციული ჩივილები აქვს, ის კლინიკა „მედალფაშია“ გადაყვანილი“ – განაცხადა ნინო ნიჟარაძემ.
დღეს, ამ დროისთვის [11 სთ], ბათუმში 5 პაციენტის ანალიზის პასუხს ელოდებიან COVID19-ზე.
ყველა პაციენტს, კორონავირუსის დადასტურებული დიაგნოზით, ბათუმში კლინიკა „მედალფაში“ მკურნალობენ.
ახალი შემთხვევის ჩათვლით, აჭარაში covid-19-ის დიაგნოზით 9 პაციენტს მკურნალობენ. ერთი პაციენტი კი გამოჯანმრთელდა და დატოვა კლინიკა.
ნინო ნიჟარაძის განცხადებით, „მედალფაში“ მყოფი ერთი პაციენტის მდგომარეობა კვლავ მძიმე რჩება, სხვა პაციენტების ჯანმრთელობის მდგომარეობა კი საშუალო და მსუბუქი ხასიათისაა.
