Batumelebi | კორონავირუსით ინფიცირებული 101 წლის კაცი გამოჯანმრთელდა, ის „ისპანკის” დროს დაიბადა კორონავირუსით ინფიცირებული 101 წლის კაცი გამოჯანმრთელდა, ის „ისპანკის” დროს დაიბადა – Batumelebi

კორონავირუსით ინფიცირებული 101 წლის კაცი გამოჯანმრთელდა, ის „ისპანკის” დროს დაიბადა

101 წლის კაცი იტალიიდან, კერძოდ რიმინიდან, ყველაზე ხანდაზმული ადამიანია, ვინც კორონავირუსით ინფიცირდა და გადარჩა. მამაკაცი ჰოსპიტალიდან უკვე გაწერეს და თავს კარგად გრძნობს.

იტალიური მედიის ცნობით, კაცი რიმინის საავადმყოფოში გასულ კვირას მოათავსეს მას შემდეგ, რაც ტესტირებით დადასტურდა, რომ კორონავირუსი ჰქონდა.

როგორც რიმინის მერი, გლორია ლიზი აცხადებს, 101 წლის კაცი ოთხშაბათს, 25 მარტს გაწერეს საავადმყოფოდან და ახლა უკვე ოჯახში იმყოფება.

გლორია ლიზმა ასევე დასძინა, რომ ეს მეორე პანდემიაა, რომელსაც ეს კაცი გადაურჩა. ის 1919 წელს დაიბადა ესპანური გრიპის, „ისპანკას“ მძვინვარების პერიოდში, რითაც მსოფლიოში 500 მილიონამდე ადამიანი დაავადდა – მაშინდელი მსოფლიო მოსახლეობის თითქმის მესამედი.

101 წლის იტალიელი კაცი ერთადერთი არ არის ხანდაზმულთა შორის, ვინც გამოჯანმრთელდა. კორონავირუსი დაძლია ჩინეთში, უჰანში მცხოვრებმა 103 წლის ქალმა ჩჟან გუანფენმაც. ის მარტის დასაწყისში გადაიყვანეს საავადმყოფოში, სადაც 1 კვირა დაჰყო, მერე კი გამოჯანმრთელდა და ოჯახში დაბრუნდა.


მთავარ ფოტოზე: რიმინი, ქალაქი, სადაც 101 წლის კაცი კორონავირუსისგან გამოჯანმრთელდა

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com