Batumelebi | „ოცნების“ მხარდამჭერები დაგვხვდნენ და გვეჩხუბეს“ – ქობულეთის მერიასთან 1 პირი დააკავეს „ოცნების“ მხარდამჭერები დაგვხვდნენ და გვეჩხუბეს“ – ქობულეთის მერიასთან 1 პირი დააკავეს – Batumelebi
RU | GE  

„ოცნების“ მხარდამჭერები დაგვხვდნენ და გვეჩხუბეს“ – ქობულეთის მერიასთან 1 პირი დააკავეს

დღეს, 25 ნოემბერს, ქობულეთის მერიის წინ, ფიზიკური დაპირისპირების დროს, პოლიციამ ხულიგნობის ბრალდებით ერთი პირი დააკავა. როგორც ქობულეთის საკრებულოს წევრი „ერთიანი ნაციონალური მოძრაობიდან“, ბონდო თედორაძე ამბობს, მას დილით სამსახურში შესვლის დროს, მერიის წინ „ქართული ოცნების“ აქტივისტები და საკრებულოს უმრავლესობის წევრები დახვდნენ და შენობაში შესვლის საშუალებას არ აძლევდნენ, რასაც ფიზიკური დაპირისპირება მოჰყვა.

„არც მერიის დაბოქლომებას ვაპირებდი და არც რაიმე აქციას, მე და ჩემი რამდენიმე მეგობარი შევხვდით მერიის წინ, რადგან თბილისში აქციაზე ვაპირებთ წასვლას. სამუშაო კაბინეტში რაღაცის დატოვებას ვაპირებდი და როცა [შენობაში] შესვლა ვცადე, დილის 8:00 საათიდან მობილიზებული ჯგუფი დამხვდა.

მერის დავალებული ტექსტებით საუბრობდნენ, „რატომ მოხვედი“, სად შედიხარ, რატომ შედიხარ“, დაიწყეს მაპროვოცირებელი სალანძღავი შეძახილები. ამ დროს ჩემი ორი მეგობარიც მოვიდა და მათზეც გადაიტანეს აგრესია, დაუპირისპირდნენ ფიზიკურად, მათ შორის მეც“, – ამბობს ბონდო თედორაძე.

ბონდო თედორაძე ამბობს, რომ ფიზიკურ დაპირისპირებაში მონაწილეობდნენ როგორც ქობულეთის საკრებულოს უმრავლესობის წევრები და მერიის თანამშრომლები, ასევე „ქართული ოცნების“ აქტივისტები.

შს სამინისტროს ინფორმაციით, ფიზიკური დაპირისპირების დროს ერთი პირი დააკავეს, ადმინისტრაციულ სამართალდარღვევათა კოდექსის 166-ე მუხლით. დაკავებული პირის ვინაობას პოლიციას არა ასახელებს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com