მთავარი,სიახლეები

მოსამართლე გიორგი ერმაკოვს: თქვენ შესაძლოა სახლის გარეშე დარჩენილიყავით

16.10.2019 • 1740
მოსამართლე გიორგი ერმაკოვს: თქვენ შესაძლოა სახლის გარეშე დარჩენილიყავით

„გამამტყუნებელი განაჩენის შემთხვევაში, თქვენი ოჯახები შესაძლოა საცხოვრებელი სახლების გარეშე დარჩენილიყო,”- მიმართა მოსამართლე დავით მამისეიშვილმა ბრალდებულ გიორგი ერმაკოვს, არჩილ ვანაძეს და ეგარსლან ლომაძეს. დღეს, 16 ოქტომბერს, სასამართლომ ისინი წინასწარ პატიმრობაში დატოვა.

ბრალდებულები გირაოთი გათავისუფლებას ითხოვდნენ იმ მოტივით, რომ ბათუმის მერთან, ლაშა კომახიძესთან, შეთანხმებას მიაღწიეს. ამ შეთანხმების მიხედვით, გამამტყუნებელი განაჩენის შემთხვევაში, ბრალდებულების ქონებიდან ანაზღაურდებოდა ზიანის ნაწილი. პროკურატურის ვერსიით, ზიანი მილიონ 376 ათასი ლარია, ქონება კი, რისთვისაც შესაძლოა ყადაღა დაედოთ – 384 ათასი ლარის ღირებულების.

“ეს მარტივი არითმეტიკაა, სრულად ვერ ანაზღაურდებოდა ზიანი… თუმცა ზიანის ანაზღაურება არ ნიშნავს იმას, რომ ბრალდებულები ავტომატურად დამნაშავეები არიან,”- აღნიშნა მოსამართლემ.

დავით მამისეიშვილის განმარტებით, ბათუმის მერს, ლაშა კომახიძეს საკრებულოს თანხმობის გარეშე და დამოუკიდებლად არ შეეძლო თანხმობის გაფორმება ბრალდებულებთან.

“ასევე, არ არის წარმოდგენილი დაზარალებულის პოზიცია,”- დასძინა მოსამართლემ. მან აქცენტი გააკეთა შეთანხმებაზე, სადაც არ ჩანს, რამდენად ჩათვლის ლაშა კომახიძე ზიანს ანაზღაურებულად, თუკი ზარალი მილიონზე მეტია, ქონება კი, რაც შეიძლება ზიანის ანაზღაურებას მოხმარებოდა, 384 ათასი ლარი ღირს.

„მოსამართლე დავით მამისეიშვილს არ უყვარს აღკვეთი ღონისძიების შეცვლა. მან დღესაც არ უღალატა ამ ჩვევას. არ გამოვრიცხავ, ყოფილიყო პოლიტიკური ინტერესიც,”- გვითხრა ადვოკატმა რამინ პაპიძემ.

„ეს მოულოდნელი გადაწყვეტილება იყო… დაცვის მხარემ წარმოადგინა ყველა მტკიცებულება, რაც ადასტურებდა მერიასთან შეთანხმებას სამომავლოდ ზიანის ანაზღაურებაზე,”- ამბობს ადვოკატი სიმონ ასათიანი.

მორიგი სასამართლო პროცესი 23 ოქტომბერს გაიმართება. მოსამართლის გადაწყვეტილება კი, რომლითაც ყოფილ მაღალჩინოსნებს უარი უთხრეს პატიმრობიდან გათავისუფლებაზე, არ საჩივრდება.

________________

ფოტო: „ბათუმელები“/ჯაბა ანანიძე

გადაბეჭდვის წესი


ასევე: