მომავალ ლიდერთა გაცვლით პროგრამაში FLEX-ი, მოსწავლეთა შერჩევა დაიწყო. პროგრამაში მონაწილეობა შეუძლიათ საჯარო და კერძო სკოლების მე-9, მე-10, მე-11 კლასის მოსწავლეებს.
შეზღუდული შესაძლებლობის მქონე პირთა შემთხვევაში, მონაწილეობა შეუძლიათ მოსწავლეებს მე-8-დან მე-12 კლასის ჩათვლით.
პროგრამაში მონაწილე მოსწავლეებს უნდა ჰქონდეთ კარგი და საუკეთესო აკადემიური მოსწრება, ფლობდნენ ინგლისურ ენას და უნდა აკმაყოფილებდნენ აშშ-ის ვიზის მოთხოვნებს.
ბათუმში პროგრამაში მონაწილეობის მსურველები ტესტირებაზე უნდა გამოცხადდნენ 5 ოქტომბერს, მე-10 საჯარო სკოლის შენობაში.
პროგრამაში მონაწილეობა შეუძლიათ 2003 წლის 1-ელი იანვრიდან 2005 წლის 16 ივლისამდე დაბადებულ პირებს.
კონკურსანტებმა ტესტირების დროს უნდა იქონიონ დაბადების მოწმობა ან პასპორტი, ერთი ფოტოსურათი 3×4-ზე და შავი საწერი კალამი.
FLEX-ი არის მოსწავლეთა გაცვლითი პროგრამა აშშ-ში, რომელსაც სრულად აფინანსებს აშშ-ის სახელმწიფო დეპარტამენტი.
პროგრამის მიზანია ხელი შეუწყოს ორი ქვეყნის ახალგაზრდებს შორის ურთიერთობის გაღრმავებას, ასევე, პროგრამის მიზანია გაიცნონ ახალგაზრდებმა ამერიკული ცხოვრების სტილი, სამოქალაქო საზოგადოების ჩართულობა და ა.შ.
პროგრამა საქართველოში 24-ედ ხორციელდება.