კვირის ამბები,კვირის ამბები

16 წლამდე გოგოსთან ქორწინება და სასჯელი

24.05.2016 • 6113
16 წლამდე გოგოსთან ქორწინება და სასჯელი

როგორია საქართველოში არასრულწლოვან გოგონებზე ქორწინების სტატისტიკა, რას ითვალისწინებს სასჯელი და ვინ და როგორ უნდა უზრუნველყოს ნაადრევი ქორწინების პრევენცია ქვეყანაში? – ამ თემაზე დისკუსია 26 აპრილს ბათუმის დემოკრატიული ჩართულობის ცენტრში არასამთავრობო ორგანიზაცია „თავისუფალ ჟურნალისტთა სახლის“ ორგანიზებით გაიმართა.

ეთერ თურაძე, ჟურნალისტი, დისკუსიის მოდერატორი: 16 წლამდე გოგოსთან ქორწინება სისხლის სამართლის კოდექსის 140-ე მუხლით ისჯება, რაც 7-დან 9 წლამდე პატიმრობას ითვალისწინებს, თუმცა სამართალდამცავ ორგანოებს შეუძლიათ სხვა აღმკვეთი ღონისძიებები გამოიყენონ. პროკურატურის მონაცემებით, 2015 წელს 189-ჯერ დაიწყო გამოძიება 140-ე მუხლით. რეგიონების მხრივ, აჭარის ავტონომიურ რესპუბლიკაში ამ მიმართულებით გამოძიება დაიწყო 19-ჯერ, ხოლო ქვემო ქართლი მოწინავე პოზიციას იკავებს, იქ 67-პირის მიმართ არის ძიება დაწყებული.

ბოლო დროს გაიზარდა შეტყობინებების რაოდენობა სამართალდამცავ ორგანოებში, თუ სრულწლოვანი მამაკაცი ქორწინდება 16 წელს მიუღწეველ გოგონასთან. მაგალითად, 2015 წლის იანვარში მხოლოდ 2-ჯერ შევიდა შეტყობინება, ნოემბერში 38-მდე გაიზარდა, დეკემბერში კი 36 შეტყობინება დაფიქსირდა.

შესწავლილ იქნა სქესობრივი ურთიერთობის გზით პოტენციურ დაზარალებულთა ასაკი, 85 შემთხვევაში სრულწლოვანს სექსუალური კავშირი ჰქონდა 15 წლის პირთან, 53 შემთხვევაში – 14 წლის პირთან, 15 შემთხვევაში – 13 წლის პირთან, 6 შემთხვევაში – 12 წლის და 3 შემთხვევაში – 11 წლის პირთან. ამ მონაცემების მიხედვით, მხოლოდ ერთი ადამიანი დაისაჯა თავისუფლების აღკვეთით, მას 8 წელი მიუსაჯეს. ბრალდებული ამ შემთხვევაში იყო 58 წლის, ხოლო დაზარალებული – 12 წლის. პროკურატურის სტატისტიკის თანახმად, 2015 წელს 52 შემთხვევაში გაფორმდა საპროცესო გარიგება.

თამაზ ბაკურიძე, ორგანიზაცია „ჩვენი უფლებებისთვის“:
ამ პრობლემასთან შეხება პირველად რამდენიმე თვის წინ მქონდა, როდესაც ხულოს რაიონის სოფელ კორტოხში მცხოვრებმა პაქსაძეების ოჯახმა მომმართა. ოჯახის ერთ-ერთი წევრი არასრულწლოვანზე დაქორწინდა, მან მითხრა, რომ ჰქონდა არჩევანი – გადაეხადა ფულადი ჯარიმა ან წასულიყო ციხეში. ჯარიმა – 4000 ლარი. ჩვენ მოვიწვიეთ ჟურნალისტები და არასამთავრობო ორგანიზაციები, ამის შემდეგ, მეორე დღესვე გენერალურმა პროკურატურამ განაცხადა, რომ ისინი დაიწყებდნენ აქტიურ კამპანიას მოსახლეობის ინფორმირების მიზნით ამ კანონის არსებობის შესახებ. ახლა ვდგავართ გოგიტა ხიმშიაშვილის პრობლემის წინაშე, რომელიც გახლავთ რამდენიმეგზის ჩემპიონი მკლავჭიდში, ცხოვრობს ყოფილი 25-ე ბატალიონის ტერიტორიაზე.

დისკუსიის მონაწილეები

დისკუსიის მონაწილეები


პროკურორის თქმით, მასაც ან ფული უნდა გადაეხადა, ან ციხეში ჩამჯდარიყო. ამ შემთხვევაშიც იგივე გავიარეთ, საქმე კვლავ წარმატებით დასრულდა. ჩემი აზრით, 2016 წლის პირველ იანვრამდე ვინც არის დაქორწინებული, მათ არ უნდა შეეხოს ეს კანონი და უნდა შემუშავდეს რეგულაცია. ადამიანი, რომელმაც იცის, რომ კანონი მას რაღაცას უკრძალავს, საწინააღმდეგო ქმედებას არ ჩაიდენს, მითუმეტეს მაღალმთიან რაიონებში, სადაც უფრო კანონმორჩილი ხალხი ცხოვრობს. მე წინააღმდეგი ვარ იმათი დასჯის, ვინც უკვე დაქორწინებულია.

ჯუმბერ უნგიაძე, გინეკოლოგი:
შესაძლოა მოზარდს გარეგნულად ჰქონდეს ჩამოყალიბებული როგორც პირველადი, ისე მეორადი სასქესო ნიშნები, მაგრამ ეს იმას არ ნიშნავს, რომ ის არის ზრდასრული. გოგოს სქესობრივად მომწიფების შემდეგ მისი მენჯის ძვლები იზრდება არაპროპორციულად, დაახლოებით 5 წლის განმავლობაში. აქედან გამომდინარე, კატეგორიულად წინააღმდეგი ვარ ნაადრევი გათხოვების. ფიზიოლოგიური თვალსაზრისით ეს არის ძალიან ცუდი, ამ გოგონებს მშობიარობისას გართულებები 11-ჯერ მეტი აქვთ, ვიდრე ზრდასრულ გოგონებს. ესაა ტოქსიკოზები, წყლების ნაადრევი დაღვრა, სამშობიარო მოქმედებების სისუსტე და რაც ყველაზე ცუდია – ფარული ტრავმები.
მსოფლიო ჯანდაცვის სამინისტრო მშობიარობისთვის იდეალურად მიიჩნევს 21-დან 25 წლის ჩათვლით ასაკს. ეს არის ყველაზე რაციონალური ასაკი იმისათვის, რომ მოხდეს დაფეხმძიმება.

დისკუსიის მონაწილეები

დისკუსიის მონაწილეები



ციალა ქათამიძე, სახალხო დამცველის აპარატის წარმომადგენელი აჭარაში:
2010 წელს საქართველოს მთავრობამ გამოსცა ბრძანება ბავშვთა დაცვის პროცედურების დამტკიცების თაობაზე, რომელშიც ყველა ტიპის ორგანიზაციას აქვს გარკვეული ტიპის ვალდებულებები. ეს გულისხმობს შეტყობინებას არასრულწლოვანთა დაქორწინების ფაქტების გამოვლინებაში. სამწუხაროდ, ეს კანონი ბოლომდე ვერ მუშაობს, გამომდინარე იქიდან, რომ განათლების სამინისტრომ ვერ მოახერხა ყველა საჯარო სკოლის ინფორმირება. თუმცა ის სტატისტიკა, რაც არსებობს, სწორედ ამ კანონის მეშვეობით არსებობს.

სახალხო დამცველის მთავარი რეკომენდაციაა, რომ შინაგან საქმეთა, ჯანდაცვისა და განათლების სამინისტროებმა მოახდინონ ამ საკითხის პოპულარიზაცია და საზოგადოებამდე მიტანა, რომ არასრულწლოვანზე ქორწინება და მასთან სექსუალური კავშირი დანაშაულია.

მზიური ჯორღილაძე: რა თქმა უნდა, არასრულწლოვნები არ უნდა თხოვდებოდნენ, მაგრამ როცა ოჯახი ჰყავს და უკვე ორი შვილი, ოჯახის დაშლა მიუღებელია. თუ 2008 წელს ჰქონდათ ეს კანონი შემოღებული, რატომ არ იყო ძალაში. ჩემს დისშვილთან მიმართებაში, ბატონი თამაზი რომ ჩაერია, ეს ყველაფერი მოუხსნეს. აქამდე ვისაც კი ოჯახი აქვს შექმნილი და ჰყავთ შვილები, დაულოცოს სახელმწიფომ და კანონმა ის ოჯახები და სხვა პრობლემებს მიაქციონ ყურადღება, უკეთესი იქნება.

გიორგი გურგენიძე: ჩემი და არის არასრულწლოვანი და დაოჯახებული, მალე შვილს ელოდება. 4000 ლარს ვერ გადაიხდის მისი ოჯახი. მე მაინტერესებს, თუ კი მის ქმარს დააკავებენ, ვინ უნდა არჩინოს ოჯახი?

ციალა ქათამიძე: კონკრეტული შემთხვევები, რომლებიც მოხდა რაღაც პერიოდის წინ, როცა არ იყო ინფორმაცია ცნობილი, სავარაუდოდ დასრულდება ქმედების გამართლებით, მაგრამ კანონის არ ცოდნა არ ათავისუფლებს არავის პასუხისმგებლობისგან, მაშინ აზრი არ ექნება ამ კანონს.

ასლან ართმელაძე, სტუდენტი: 16 წლის გოგო, რომელიც თხოვდება და 16 წლის ბიჭი, რომელსაც ცოლი მოჰყავს, თვითონ გასაზრდელია და ბავშვს როგორ გაზრდის? ჩემს მშობელს, სანათესაოს სოფელში, უპრობლემოდ მიაჩნიათ, როცა 16 წლის გოგო/ბიჭი დაოჯახდება, იძახიან ეშველებათ რამე, ღმერთი მისცემს. არაფერი ეშველებათ, არ მისცემს ღმერთი. თუ ახალგაზრდამ არ ისწავლა, ატესტატი არ აიღო, თუ დიპლომი არ ექნება და მერე სამუშაოზე არ მოეწყო, მას ვერავინ არჩენს, ვერავინ გაზრდის.
ის ახალგაზრდები, რომლებმაც 16 წლის ასაკში ოჯახი შექმნეს, სკოლებში უნდა მივიდნენ და სხვებს უთხრან _ მე ეს შეცდომა დავუშვი და თქვენ აღარ დაუშვათ. კიდევ ერთი დიდი პრობლემაა _ სექსუალური თავისუფლება არ გვაქვს, ახალგაზრდებს არ აძლევენ უფლებას იარონ შეყვარებულებთან ერთად, ჰყავდეთ შეყვარებულები, ეს იწვევს აგრესიას და შემდეგ ისინი იპარებიან. სანამ მშობლები არ მიხვდებიან, რომ შვილებს სჭირდებათ შედარებით რბილი მიდგომა, 10-20 წლის შემდეგაც ვიკითხავთ, რა გვეშველება?

ნუგზარ ფუტკარაძე: ჩემი აზრით, ამ შემთხვევაში მშობელი ვერ იქნება დამნაშავე, ეს პრობლემა მოდის განათლების სისტემიდან, რადგანაც მოზარდი იქ იღებს განათლებას და ინფორმაციას. ჩემი აზრით, სკოლაში უნდა იყოს სექსუალური ცხოვრების გაკვეთილები.

მარინა ბერიძე: უყვარდეთ ერთმანეთი, მაგრამ ნუ იქორწინებენ, თორემ თუ დარჩა მარტოხელა დედა, სახელმწიფოს მისი რჩენა უფრო გაუჭირდება. მარტოხელა დედა იცხოვრებს თავშესაფარში, ბიჭს ჩასვამენ ციხეში და აღარ გამრავლდება ერი.

სოფო კახაძე, სტუდენტი: 16 წლის ასაკში როდესაც ქმნი ოჯახს, არ გაქვს განათლება, სამსახური, ვის ხარჯზე აკეთებ ამას? მშობლების ხარჯზე და ყველაფერი სკოლას უნდა გადავაბრალოთ, მშობელმა კი მთელი პასუხისმგებლობა უნდა მოიხსნას?

დისკუსიის მონაწილეები

დისკუსიის მონაწილეები


სალომე ფუტკარაძე, სტუდენტი: საინფორმაციო კამპანია უნდა ეწარმოებინა შინაგან საქმეთა სამინისტროს და სკოლას. 15-დან 18 წლამდე ასაკი – ეს ის პერიოდია, როცა მოზარდები არიან სკოლაში და სკოლა არის ინფორმაციის გავრცელების კარგი გარემო. როცა შინაგან საქმეთა სამინისტრომ ეს კანონი მიიღო, მაშინვე უნდა დაწყებულიყო სკოლებში საინფორმაციო კამპანიის წარმოება. თუ სკოლებში გამოჩნდებოდა ბანერები დიდი წარწერით, რომ 16 წლამდე ქორწინება დანაშაულია და ამის გამო დაისჯებიან, ეს პრობლემაც შემცირდებოდა.

ედო მჟავანაძე, სტუდენტი:
არასრულწლოვანთა ქორწინების შემთხვევაში მხოლოდ ბიჭი ისჯება?

ციალა ქათამიძე: აქ არ არის საუბარი ქალსა და კაცზე. მამაკაცი ისჯება იმ გარემოების გათვალისწინებით, რომ ქორწინდება არასრულწლოვან გოგონაზე.

ქეთევან წულუკიძე, მეათე კლასის მოსწავლე:
რამდენიმე დღის წინ ჩემი თანაკლასელი დაინიშნა და კანონის გათვალისწინებთ უწევს 2 წლით მოცდა. როცა ვკითხე, თუ რატომ გააკეთა ეს, მიპასუხა, რომ ჭორაობა აირიდა თავიდან. მე მაინტერესებს, ამის მაგალითზე, რამდენად გაამართლა ამ კანონმა?

ციალა ქათამიძე: მაგალითად, სახელმწიფო არასრულწლოვანს, რომელსაც არ აქვს მართვის მოწმობა და მაინც მართავს მანქანას, ორმაგად აჯარიმებს და ამ ადამიანმაც უნდა გააცნობიეროს, რომ ეს არის დასჯადი ქმედება. მე ვფიქრობ, რომ მიღებული კანონი სამართლიანი და სწორია. და ერთიც, რომელი თქვენგანი დაჯდება ტრანსპორტში, რომელსაც მართავს არასრულწლოვანი?!

თამუნა თაბუკაშვილი, დისკუსიის მონაწილე:
აქ არის ადამიანი, რომელიც უკვე 7 თვის ფეხმძიმეა და არის სოციალურად დაუცველი. მაინტერესებს, რა ელოდება ამ ბავშვს ამ შემთხვევაში და მის მეუღლეს და რა ხდება იმ შემთხვევაში, როცა მარტოხელა დედა შემოდის?

ციალა ქათამიძე: სახელმწიფო არასრულწლოვნად მიიჩნევს კონკრეტული კატეგორიის ადამიანებს და ამ ადამიანებს აქვთ გარკვეული უფლებები შეზღუდული, არ არიან ჩამოყალიბებული და ადვილია ძალადობა მათზე, ამიტომ სახელმწიფოს აქვს მტკიცე ნება და იტოვებს უფლებას, რომ აკრძალოს მათი სამართლებრივ და სხვა ტიპის ურთიერთობებში შესვლა.

მალხაზ ჭკადუა, „საერთაშორისო გამჭვირვალობა-საქართველოს“ ბათუმის ოფისი:
გაეროს ბავშვთა ფონდის სტატისტიკის მიხედვით ჩამოგითვლით ქვეყნებს, სადაც ყველაზე მაღალია 18 წლამდე ასაკის ბავშვების გათხოვების და მათი შემდგომ დედობის მაჩვენებელი: ნიგერია-76%; ცენტრალური აფრიკის რესპულიკა-68%; ჩადი-68%; ბანგლადეში-65%; მალი-55%; გვინია-52%; სამხრეთ სუდანი-52%; მალავი-50%; მოზამბიკი-48%.
საქართველო არ შედის ამ რიცხვში, მაგრამ ყველას ხომ გვქონდა რეაქცია, რომ პოსტსაბჭოთა ქვეყნების ჩამონათვალში ვართ ყველაზე ცუდ მდგომარეობაში.

დისკუსიის სრული ვიდეოჩანაწერი:

გადაბეჭდვის წესი


ასევე: