ძველ ბულვართან კიდევ ერთი ცათამბჯენის აგება იგეგმება

ბათუმის ბულვარის ცენტრალურ შესასვლელთან კომპანია „დიეს გრუფი“ მაღლივი შენობის – „დიეს თაუერის“ აგებას გეგმავს. ესკიზი, რომელიც გასულ კვირას გავრცელდა „ფეისბუქზე“ და რომელმაც საზოგადოების არაერთგვაროვანი რეაქცია გამოიწვია, როგორც „ბათუმელებს“ უთხრეს კომპანიაში, საბოლოო არ არის და სამუშაო ვერსიაა.

„ჯერ მუშა პროცესია, ეს სარეკლამო რგოლი იყო, უბრალოდ, თვალს ვაჩვევთ, რომ რაღაც მაგდაგვარი იქნება,“ – აღნიშნა „ბათუმელებთან“ დავით სალაძემ, კომპანია „დიეს გრუფის“ წარმომადგენელმა. მისი თქმით, დაგეგმილი მშენებლობის 17 ესკიზი არსებობს და ჯერ კიდევ შერჩევის პროცესში არიან.

შენობა მაღლივი იქნება, მაგრამ ზუსტად რამდენი მეტრი, ამას კომპანიაში ჯერ ვერ ამბობენ. თუმცა ცნობილია, რომ „დიეს თაუერის~ პირველ ათ სართულზე სასტუმროს ნომრები უნდა განთავსდეს, დანარჩენი ფართობი კი ბინებს დაეთმობა. გასულ წელს შენობის სავარაუდო სიმაღლედ 120 მეტრი სახელდებოდა, თუმცა წელს შენობის სიმაღლეს კომპანია ჯერ არ აკონკრეტებს.

„რაც შეეხება შენობის სიმაღლეს, ეს მარტო მერიისა და დეველოპერის გადაწყვეტილება არ არის, აქ ხალხის აზრიც იქნება გათვალისწინებული. ჩვენ მაქსიმალურად ვცდილობთ, პროექტი ისეთი იყოს, არავინ გულნატკენი არ დარჩეს,“ – ამბობს დავით სალაძე.

„მერიაში მსგავსი პროექტი არ შემოსულა. ამ ტერიტორიაზე კოეფიციენტი არის 3.0, მის გაზრდაზე საჭიროა აჭარის ავტონომიური რესპუბლიკის მთავრობის თავმჯდომარის შუამდგომლობა, რაც არა აქვს კომპანიას. შესაბამისად, რომც შემოიტანოს კომპანიამ საკითხი განსახილველად, ვერც კი განვიხილავთ,“ – განაცხადა „ბათუმელებთან“ ირაკლი ახალაძემ, ბათუმის მერიის არქიტექტურისა და ურბანული დაგეგმარების სამსახურის უფროსმა.

კომპანია „დიეს გრუფის“ მფლობელები რუსეთის ფედერაციის მოქალაქეები არიან. კომპანიის 50-პროცენტიან წილს სერგეი დავიდოვი ფლობს, დანარჩენ 50-ს კი – მელიტონ ტორჩინავა.