კვირის ამბები,მთავარი

სოფლები საბავშვო ბაღის გარეშე, შენობა კი სხალთის ეპარქიის სარგებლობაში

02.05.2016 • 2665
სოფლები საბავშვო ბაღის გარეშე, შენობა კი სხალთის ეპარქიის სარგებლობაში

შუახევის მუნიციპალიტეტში, დაბა ხიჭაურსა და მიმდებარე სოფლებში მცხოვრები მოსახლეობა ხიჭაურის ტერიტორიაზე, ყოფილ სამხედრო ბაზაზე არსებულ საბავშვო ბაღის შენობაში ბაგა-ბაღის აღდგენას უკვე წლებია ითხოვს. ბაღის გახსნის მოთხოვნით მოსახლეობამ წერილი აჭარის მთავრობის თავმჯდომარესაც გაუგზავნა, თუმცა ადგილობრივ გამგეობაში აცხადებენ, რომ აღნიშნული ტერიტორია საპატრიარქოს საკუთრებაა, შესაბამისად, მისი განკარგვის უფლება მხოლოდ ეპარქიას აქვს.

დაბა ხიჭაურში საპატრიარქოს ტბელ აბუსერისძის უნივერსიტეტის მიმდებარედ (ოღონდ არა უნივერსიტეტის შემოვლებული გალავნის შიგნით), საცხოვრებელი სახლების წინ, ორსართულიანი შენობა დგას. როგორც აქ მცხოვრები მოსახლეობა ამბობს, შენობაში წლების წინ, როცა ხიჭაურში საბჭოთა კავშირის სამხედრო ბაზა არსებობდა, საბავშვო ბაღი იყო. მას შემდეგ, რაც აქ სამხედრო ბაზა დაიშალა, საბავშვო ბაღიც გაუქმდა და შენობა უფუქციოდ დარჩა. ამჟამად შენობას არც კარები აქვს, არც ფანჯრები და საყრდენი კედლების ნაწილიც ალაგ-ალაგ ჩამომტვრეულია. ამორტიზებულ შენობას ახალი მხოლოდ სახურავი აქვს.

ხიჭაურისა და მიმდებარე სოფლების მოსახლეობა საბავშვო ბაღის გახსნას სწორედ ამ შენობაში წლებია ითხოვს. შუახევის მუნიციპალიტეტის გამგეობას მოსახლეობამ ამ მოთხოვნით არაერთხელ მიმართა. ბოლო ასეთი განცხადება, რომელსაც, როგორც შუახევის მუნიციპალიტეტის გამგებელი ამბობს, ხელს 200-ზე მეტი ადამიანი აწერს, აჭარის მთავრობიდან მიიღო შუახევის გამგეობამ, რადგან ბაღის გახსნის მოთხოვნით წერილი სოფლების მოსახლეობამ მთავრობის თავმჯდომარეს, არჩილ ხაბაძეს გაუგზავნა, აჭარის მთავრობამ კი წერილი შუახევის გამგეობას გადაუგზავნა.

შუახევის მუნიციპალიტეტის გამგეობის ეკონომიკის, არქიტექტურისა და ინფრასტრუქტურის სამსახურის მთავარი სპეციალისტი ქონებისა და მიწის მართვის საკითხებში, შოთა აბაშიძე ამბობს, რომ ხიჭაურის ტერიტორიაზე არსებული ყოფილი ბაგა-ბაღის ის შენობა, სადაც ადგილობრივები ბაღის გახსნას ითხოვენ, 2007 წლამდე სახელმწიფოს ქონება იყო, 2007 წელს კი სახელმწიფომ უზურფრუქტის წესით საპატრიარქოს გადასცა. თუმცა ერთი წლის შემდეგ, 2008 წელს, ხელშეკრულება შეცვალა და 10 წლის სარგებლობის ვადით შენობა მიწის ნაკვეთთან ერთად საპატრიარქოს გადასცა. შესაბამისად, შენობის განკარგვის უფლება დღეს საპატრიარქოს, ამ კონკრეტულ შემთხვევაში კი, სხალთის ეპარქიას აქვს. შესაბამისად, იქ ბაღს ადგილობრივი გამგეობა ვერ გახსნის.

მოსახლეობის მოთხოვნა საფუძვლიანად მიაჩნია თავად მუნიციპალიტეტის გამგებელს ტარიელ ებრალიძეს. გამგებელი ამბობს, რომ ამ შენობაში ბაღის გახსნას სხალთის ეპარქიის ეპისკოპოსი სპირიდონი აპირებს.

„მოსახლეობის მოთხოვნა ბაგა-ბაღის გახსნასთან დაკავშირებით სრულიად სამართლიანად მიმაჩნია. ბაღი, გახსნის შემთხვევაში, მოემსახურება როგორც ხიჭაურის დასახლებას, ასევე სოფლებს: ზედა ყანას, ცივაძეებს, ტაკიძეებს, ახალდაბას. არ არის გამორიცხული, რომ ქედის მომიჯნავე სოფლებში მცხოვრებმა მოსახლეობამაც ისარგებლოს.
საუბარი მქონდა მეუფე სპირიდონთან. პირად საუბარში მან მითხრა, რომ რამდენიმე დღეში აღნიშნული შენობის რეაბილიტაციისთვის პროექტი და ხარჯთაღრიცხვა მომზადდება. ინჟინერ-კონსტრუქტორები შეამოწმებენ შენობის მდგრადობას, დაიდება დასკვნები. იმ შემთხვევაში, თუ არსებული შენობა ვერ გაუძლებს იმ დატვირთვას, რაც უნდა მოეწყოს [საბავშვო ბაღი], არ დაიწყება რეაბილიტაცია“, – ამბობს გამგებელი.

იმ შემთხვევაში, თუ საპატრიარქო ადგილობრივი მოსახლეობის მოთხოვნას ვერ გაითვალისწინებს და ბაღს ვერ გახსნის, გამგებელი ამბობს, რომ ბაღის გახსნას ამ დროისთვის ვერც ადგილობრივი ხელისუფლება შეძლებს, რადგან მუნიციპალურ საკუთრებაში ხიჭაურის ტერიტორიაზე თავისუფალი ალტერნატიული ფართობი არ მოეპოვებათ, ახალი შენობის აგება კი ბევრ თანხას მოითხოვს: „ჩვენ მაქსიმუმი უნდა გავაკეთოთ, რომ ხიჭაურში ბაგა-ბაღი იყოს, ალტერნატიულ ფართობს მოვძებნით, თუმცა ამ ტერიტორიაზე ახალი ბაღის აშენებას 300 000 ლარი მაინც დასჭირდეს. ამ ოდენობის თანხის მოძიება მცირებიუჯეტიანი მუნიციპალიტეტისთვის ადვილი არ არის“.

გაითვალისწინებს თუ არა ადგილობრივი მოსახლეობის მოთხოვნას და გახსნის თუ არა საბავშვო ბაღს ყოფილ შენობაში კვლავაც საბავშვო ბაღს? თუ ბაღს არა, მაშინ რის გახსნას აპირებს ეპისკოპოსი სპირიდონი ყოფილი ბაგა-ბაღის შენობაში? – ამ კითხვებზე პასუხის მისაღებად ეპისკოპოს სპირიდონის ჩაწერა არაერთხელ ვცადეთ, თუცა მან „ბათუმელების“ სატელეფონო ზარებს არ უპასუხა. „ბათუმელები“ ასევე დაუკავშირდა ხიჭაურში საპატრიარქოს წმინდა ტბელ აბუსერისძის უნივერსიტეტის საზოგადოებასთან ურთიერთობის სამსახურის უფროსს, რომელმაც განაცხადა, რომ შვებულებაში იმყოფება და უნივერსიტეტის ადმინისტრაციასთან გადაგვამისამართა.

სხალთის ეპარქიას სახელმწიფომ ძველი ბაღის შენობასთან ერთად 2007 წელს 18 შენობა და მთლიანობაში 61 776 კვადრატული მეტრი მიწის ნაკვეთი გადასცა.

ძველი საბავშვო ბაღის შენობა ხიჭაურში ახლა სხალთის ეპარქიის საკუთრებაა / ფოტო: ეკა ბარამიძე

გადაბეჭდვის წესი


ასევე: