კვირის ამბები,კვირის ამბები,მთავარი

გაზზე მომუშავე ავტომობილების ტექდათვალიერება გადაიდო

15.04.2016 • 5809
გაზზე მომუშავე ავტომობილების ტექდათვალიერება გადაიდო

2016 წლის პირველ აპრილამდე ბუნებრივ აირზე მომუშავე ავტომობილებს სავალდებულო შემოწმება უნდა გაევლოთ, თუმცა ეს პროცედურა ერთი წლით კიდევ გადაწიეს. რა სტანდარტებს უნდა აკმაყოფილებდეს ავტომანქანა ბუნებრივ აირზე გადაყვანის შემთხვევაში, არის თუ არა მგზავრების უსაფრთხოება დაცული და რა მოხდება მაშინ, თუკი ავტომობილი ტექნიკურ ინსპექტირებას ვერ გაივლის?

მთავრობის დადგენილებით, აირბალონზე მომუშავე ავტომობილების ინსპექტირება „აკრედიტაციის ეროვნული ცენტრის“ მოვალეობა იყო. თუმცა, როგორც ამ ცენტრში გვითხრეს, მათ არა ავტომობილების, არამედ იმ პირების აკრედიტაცია ევალებოდათ, ვინც აირბალონიანი ავტომობილების ტექნიკურ მონიტორინგს განახორციელებს.

`ჩვენთან უნდა მოსულიყო აკრედიტაციის მაძიებელი დაინტერესებული პირი, უნდა გაევლო პროცედურები, მიეღო უფლებამოსილება აკრედიტაციის მოწმობის სახით, რომ შეძლებოდა ამ ავტომობილების ინსპექტირება.

იმის გამო, რომ ბაზარზე არ გაჩნდა აკრედიტებული პირი, რომელიც მოახდენდა ავტომობილების ინსპექტირებას, მთავრობამ 31 მარტს შეცვალა სამოქმედო გეგმა და გარდამავალი პერიოდი 2017 წლის პირველ იანვრამდე გადაწია“, – ამბობს „აკრედიტაციის ეროვნული ცენტრის“ ადმინისტრაციის უფროსი მერი დეკანოიძე.

მისივე ინფორმაციით, აკრედიტაციის მიღების მოთხოვნით ცენტრს მხოლოდ ორმა პირმა მიმართა. აქედან ერთმა, შპს „გაზინჟინერმა“, ერთი კვირის წინ მიიღო აკრედიტაცია.

რა სტანდარტებს უნდა აკმაყოფილებდეს აირზე მომუშავე ავტომობილი და რა მოხდება იმ შემთხვევაში, თუკი ავტომობილი ინსპექტირებას ვერ გაივლის? – საკითხის გასარკვევად „ბათუმელებმა“ შპს „გაზინჟინერის“ ხელმძღვანელს, ნუგზარ მაჭარაშვილს მიმართა.

„ჩვენ აკრედიტაცია მივიღეთ 29 მარტს, ტრანსპორტის სააგენტოში გვაქვს შეკვეთა ფირნიშების დამზადებაზე და როცა ამას მივიღებთ, შემდეგ ყველა ავტოსერვისცენტრსა და ბენზინგასამართ სადგურში დავტოვებთ ინფორმაციას, რომ ტექნიკურ დათვალიერებაზე უნდა მოგვმართონ ჩვენ. ბუნებრივ აირზე მომუშავე ავტომანქანას, რომელიც გაივლის ტექნიკურ ინსპექტირებას, საქარე მინაზე ექნება ჩვენი აკრედიტაციის ნიშანი, რომელიც ვერ გაივლის – არა“, – ამბობს ნუგზარ მაჭარაშვილი.

ტექნიკური ინსპექტირება 60 ლარი ეღირება. იმ შემთხვევაში, თუკი ავტომობილი ვერ დააკმაყოფილებს მოთხოვნებს, ეს ინფორმაცია გადაეცემა გაზგასამართ სადგურებს და ამ ავტომობილებს გაზს აღარ ჩაუტვირთავენ. ინფორმირებული იქნება ასევე პატრულიც.

როგორც „გაზინჟინერის“ ხელმძღვანელი ამბობს, აირბალონებს აქვთ საგარანტიო ვადა. ამ ვადის გასვლის შემთხვევაში, ბალონის გამოყენება დაუშვებელია. „გარდა ვადისა, არის კიდევ გარკვეული დეტალები, რომლებსაც ტექნიკური რეგლამენტი ითვალისწინებს. შემოწმება მოხდება ყველა ამ დეტალის მიხედვით“.

ნუგზარ მაჭარაშვილი ამბობს, რომ ამ დროისთვის არ აქვთ დაზუსტებული ინფორმაცია, რამდენი ავტომობილი მუშაობს ბუნებრივ აირზე ქვეყანაში. „გაზინჟინერი“ ავტომობილების ტექნიკურ შემოწმებას თბილისსა და ქუთაისში აპირებს. ვინ ჩაატარებს მსგავს ინსპექტირებას ბათუმში, ჯერჯერობით უცნობია.

„ვიცოდი, რომ არჩევნებამდე არც დაიწყებოდა ეს პროცესი“, – ამბობს ერთ-ერთი ტაქსის მძღოლი. მას არც მთავრობის დადგენილების და არც ცვლილების შესახებ არაფერი სმენია.

კიდევ ერთი ტაქსის მძღოლი მამუკა აბუსერიძე გვეუბნება, რომ ბუნებრივი აირი მაშინ არის სახიფათო, თუ ბალონი მანქანაში კუსტარულად არის დამონტაჟებული. „თანხის დაზოგვის მიზნით ზოგიერთი თვითონ ცდილობს დაამონტაჟოს. სხვა მხრივ, გაზი ბენზინზე სახიფათო არ არის. ერთადერთი პრობლემა ისაა, რომ ძალიან უხარისხო გაზი შემოდის აჭარაში და ავტომანქანის ნაწილებს აზიანებს.“

„ლოვატო“ ერთ-ერთი ავტომომსახურების ცენტრია ბათუმში, სადაც ავტომანქანებში ბუნებრივი აირის ბალონებს ამონტაჟებენ. მისი წარმომადგენელი გელა მაგრაქველიძე ამბობს, რომ თუ ავტომანქანის ძრავა გამართული არ არის, ასეთ ავტომანქანაში ბალონს არ ამონტაჟებენ. „აირბალონების ძირითადი მომწოდებელია ჩინეთი, ინდოეთი და იტალია. ხშირად იტალიურ აპარატურას აყენებენ, თუმცა ხარისხის სტანდარტებს სხვა ქვეყნებში წარმოებული ბალონებიც აკმაყოფილებს“.

DSCN8783

მისი თქმით, ახალი ბალონები 350 ატმოსფეროზე მოწმდება ქარხნებში და ერთჯერადი დარტყმის წნევას 800 ატმოსფეროზეც უძლებს. „იმ ავტომანქანებში, რომლებშიც გაზი აფეთქდა, ძველი რუსული ბალონები ჰქონდათ დამონტაჟებული. ახალი ბალონების გამოყენების ვადა ჩინურის 15 წელია, იტალიურის – 20. საბჭოთა ბალონების გამოყენება დაუშვებელია,“ – ამბობს ის.

პირველი სიგნალი, რასაც გაზზე მომუშავე ავტომობილის მძღოლმა უნდა მიაქციოს ყურადღება, ხმაურია: „20 ათასი კილომეტრის გავლის შემდეგ ბალონი იწყებს წივილს. ამიტომ მძღოლი აუცილებლად უნდა მივიდეს სერვისცენტრში და ტექნიკურად შეამოწმოს. ბალონის ტესტირება ყოველ სამ წელიწადში უნდა ჩატარდეს“.

კიდევ ერთი წესი, რომელიც უნდა გაითვალისწინონ გაზზე მომუშავე ავტომობილის მძღოლებმა: ბალონის ჩატვირთვის დროს, ავტომანქანაში არც მძღოლი და არც მგზავრები არ უნდა ისხდნენ. „ჩემი აზრით, ხანძარსაწინააღმდეგო ბალონებიც უნდა იყოს ავტომანქანებში, რასაც არც ერთი მძღოლი არ ატარებს,“ – ამბობს მამუკა აბუსერიძე.

ომარ პატარიძეც ერთ-ერთი ავტოსერვისის წარმომადგენელია. მისი თქმით, ავტომობილის აირზე გადაყვანის ფასი 1100-1700 ლარია.

გადაბეჭდვის წესი


ასევე: