„იუთუბზე” 17 წლის ემი ვაინჰაუსის უცნობი ჩანაწერი გავრცელდა

კომპოზიტორი და მუსიკოსი გილ კანგი ინტერნეტში ემი ვაინჰაუზის უცნობ დემოჩანაწერს ავრცელებს, რომელიც მომღერალმა ჯერ კიდევ 17 წლის ასაკში ჩაწერა ხმის ჩამწერი ლეიბლებისთვის საჩვენებლად.

მომღერლის ჩანაწერების დემოვერსიები ძირითადად 2011 წლის შემდეგ, მისი გარდაცვალებისთანავე გაანადგურეს, თუმცა კომპოზიტორსა და მუსიკოსს გილ კანგს ვაინჰაუსის სიმღერის – „My Own Way“-ს დემოვერსიის ასლი აღმოაჩნდა.

ინფორმაცია 26 თებერვალს „გარდიანმა” გაავრცელა.

17 წლის ემი ვაინჰაუსის უცნობი  ჩანაწერი „იუთუბზე“ 25 თებერვალს ატვირთეს და სიმღერის უცნობი დემოვერსია უკვე 200 ათასზე მეტმა ადამიანმა მოისმინა.


ემის შესრულებული სიმღერა „My Own Way“ გილ კანგმა ჯეიმს მაკმილანთან ერთად დაწერა.

მომღერლის არასრული ჩანაწერები და სხვა სიმღერების დემოვერსიები 2011 წლის შემდეგ გაანადგურეს ხმის ჩამწერმა სტუდიებმა და თავიდან აირიდეს ვაინჰაუსის გარდაცვალებისშემდგომი ალბომების გავრცელება, ამის შესახებ „გარდიანი“ 2015 წლის ივლისშიც წერდა. თუმცა გილ კანგმა სიმღერის „My Own Way“-ს ჩანაწერი მაინც ატვირთა „იუთუბზე“ და თინეიჯერი, იმ დროისათვის უცნობი ემი ვაინჰაუსის ხმა საჯარო სივრცეს დაუბრუნა.

წყარო: theguardian

ნეტგაზეთის მასალების სხვა გამოცემებში გადაბეჭდვის წესი


ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან