„ნონა“ ევროპის ჩემპიონატის სამზადისში

ბათუმში, ფიროსმანის ქუჩაზე მდებარე სპორტსკოლაში მოჭადრაკეები ვარჯიშობენ. ამ მისამართზე მდებარეობს ბათუმის საჭადაკრო კლუბი „ნონა“, ევროპის ორგზის ჩემპიონი. აქ, კლუბის ხელმძღვანელების თქმით, 250-ზე მეტი ბავშვი სწავლობს ჭადრაკის თამაშს.

საჭადრაკო კლუბი "ნონას" წევრები. ფოტო: chessbatumi.ge

საჭადრაკო კლუბი “ნონას” წევრები. ფოტო: chessbatumi.ge

სექტემბრის ბოლოს საჭადრაკო კლუბი „ნონა“ საქართველოს საკლუბო ჩემპიონატის გამარჯვებული გახდა, ახლა კი მოჭადრაკეები ევროპის ქალთა საკლუბო ჩემპიონატისთვის ემზადებიან, რომელიც სერბეთში გაიმართება 5-13 ნოემბერს. ზედიზედ ორი წელია „ნონა“ ამ ჩემპიონატის გამარჯვებულია და გუნდი ახლაც ამ ტიტულის შესანარჩუნებლად ემზადება. ამჟამად მოჭადრაკეები თბილისში გადიან მომზადებას. უკვე ცნობილია გუნდის შემადგენლობა: „ნონას“ პირველი დაფა 29 წლის ნანა ძაგნიძე იქნება, რომელსაც „ფიდეს“ რეიტინგში, მოქმედ მოჭადრაკეებში, მე-13 ადგილი უკავია ქალთა შორის მსოფლიო მასშტაბით. ნანა, ისევე როგორც „ნონას“ კიდევ ერთი მოჭადრაკე ბელა ხოტენაშვილი, თბილისიდანაა. გუნდის დანარჩენი წევრები კი ბათუმელი მოჭადრაკეები არიან: ნინო ბაციაშვილი, მირანდა მიქაძე და სალომე მელია.

„ჩვენ ვართ ევროპის საკლუბო ჩემპიონატის ორგზის ჩემპიონები და ასევე მოქმედი ჩემპიონები“, – ამბობს გიორგი ჭატურია, საჭადრაკო კლუბ „ნონას“ დირექტორი – „თუ ამ შედეგებს შევინარჩუნებთ და „ნონა“ მესამედ გახდება ჩემპიონი, ეს იქნება ჩვენი დიდი გამარჯვება. ევროპის ქალთა საკლუბო ჩემპიონატი ჭადრაკში, ფაქტობრივად, არის მსოფლიოს საკლუბო ჩემპიონატი, რადგან მსოფლიო საკლუბო ჩემპიონატი არ არსებობს და საუკეთესო მოჭადრაკეები აქ იყრიან თავს – გუნდებს შეუძლიათ მოჭადრაკეების დაქირავება. ყველა ეროვნულ ნაკრებს აქვს თავისი ნაკლი – ნაკრებში ყველა ერთნაირად ძლიერი ვერ იქნება, მაგრამ აქ სხვა სიტუაციაა, ქირაობ და მოგყავს ყველაზე ძლიერი“.

„ნონას~ მთავარი კონკურენტი წელს, ისევე როგორც გასულ წლებში, მონაკოს საჭადრაკო კლუბი „მონტე კარლო~ იქნება – ევროპის ქალთა საჭადრაკო ჩემპიონატის ხუთგზის გამარჯვებული, ერთგვარი რეკორდსმენი, სადაც წელს მსოფლიოს საუკეთესო მოჭადრაკე ქალები თამაშობენ.

„მონაკოს გუნდის პირველი დაფაა მსოფლიოს მოქმედი ჩემპიონი, ჰოუ იფანი [ჩინელი მოჭადრაკე, პირველი ნომერი „ფიდეს“ ქალთა მსოფლიო რეიტინგში], გუნდში თამაშობს მარია მუზიჩუკი, მსოფლიოს ვიცე-ჩემპიონი, რომელმაც მსოფლიო ჩემპიონობა ჰოუ იფანთან შეხვედრის შემდეგ დათმო. დანარჩენი გოგონები არიან ევროპული ნაკრებების პირველი დაფები. ეს ნიშნავს, რომ ყველა დაფაზე თამაშობს პირველი დაფა. მსოფლიოს საუკეთესო მოჭადრაკე ქალები არიან, ვარსკვლავური გუნდია“, – ამბობს მარიკა ჯაფარიძე, „ნონას“ მენეჯერი და მწვრთნელი.

რა შანსი აქვს „ნონას“ ასეთ მეტოქეებთან? 2014 და 2015 წლებში „მონტე კარლოს~ ბათუმურმა კლუბმა ორჯერ აჯობა საერთო შედეგით და ევროპის ჩემპიონი გახდა, კლუბში ახლაც ოპტიმისტურად არიან განწყობილი. „ვიცით, რომ ეს იქნება ძალიან რთული, მაგრამ ჩვენ ძალ-ღონეს არ დავიშურებთ“, – ამბობს გიორგი ჭანტურია.

2013 წლიდან საჭადრაკო კლუბ „ნონას“ ბათუმის მერია აფინანსებს. კლუბის დირექტორი ამბობს, რომ ამჟამად 250-ზე მეტი ბავშვი სწავლობს მათ კლუბში ჭადრაკს უფასოდ.

„ბევრი ბავშვი მოდის, ინტერესი დიდია. არიან ბავშვები, რომლებიც მარტო შაბათ-კვირას მოდიან, არიან ბავშვები, რომლებიც მოგვმართავენ თავისი ინიციატივით… და არა მარტო ბავშვები, დიდებიც ვარჯიშობენ ჩვენთან. ერთადერთი სპორტის სახეობა ვართ, რომელიც უსასყიდლოდ ემსახურება ბავშვებს, დიდებს, გადასახადი არ არის არანაირ ეტაპზე. გარდა ამისა, პერიოდულად ვიწვევთ დიდოსტატ მწვრთნელებს ბავშვებთან თამაშების ჩასატარებლად. მაგალითად, ნონა გაფრინდაშვილი იყო ჩვენი სტუმარი. პერიოდულად ჩვენი კლუბის დიდოსტატები, ნინო ბაციაშვილი და სალომე მელია ატარებენ მასტერკლასებს და გუნდურ თამაშებს. გვაქვს გაცვლითი პროექტები, ტურნირები… ასეთი ღონისძიებები ძალიან მნიშვნელოვანია ბავშვების პრაქტიკისთვის, მათი სტიმულისთვის. ახლა ჩვენთან იმყოფება დავით ჯოჯუა და მწვრთნელებს ამზადებენ, მასტერკლასები ტარდება. შემდგომში გადავამზადებთ სკოლის მწვრთნელებს, რომ სერტიფიკატები აიღონ მასწავლებლებმა“, – ამბობს გიორგი ჭანტურია.

საჭადრაკო კლუბი "ნონას" წევრები. ფოტო: chessbatumi.ge

საჭადრაკო კლუბი “ნონას” წევრები. ფოტო: chessbatumi.ge

საჭადრაკო კლუბ „ნონას“ საკუთარი შენობა არ გააჩნია. კლუბში ამბობენ, რომ მერია მათ ყველანაირად ეხმარება, თუმცა შენობის საკითხი გადაუჭრელი რჩება, ამიტომაც „ნონა“ ჯერჯერობით სპორტსკოლაში ქირაობს ოთახს.

გიორგი ჭანტურია: „მერია ნამდვილად ხელს გვიწყობს და ამის შედეგია ის, რომ კლუბში 250 ბავშვი დადის, ყოველდღიურად გვემატებიან ბავშვები და ადგილიც კი არ არის ფიზიკურად, რადგან შენობა არ გვაქვს. ცდილობენ ამ პრობლემების მოგვარებას, ეძებენ ვარიანტს. იყო რამდენიმე ვარიანტი, უბრალოდ, ჩვენ ჩვენი კუთხითაც ვუდგებით, რადგან კლუბის შენობა საერთაშორისო სტანდარტებს უნდა აკმაყოფილებდეს“.

საჭადრაკო კლუბი "ნონას" წევრები. ფოტო: chessbatumi.ge

საჭადრაკო კლუბი “ნონას” წევრები. ფოტო: chessbatumi.ge

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com