ქედის მუნიციპალიტეტის სოფელ ვაიოში მცხოვრები 15 წლის ანრი დევაძე ერთ-ერთია საქართველოს მაგიდის ჩოგბურთის ეროვნული ნაკრებიდან, რომელიც წელს ზაფხულში, ხორვატიაში დაგეგმილ ჩემპიონატზე საქართველოს სახელით იასპარეზებს.
ანრი დევაძე
„სოფელ ვაიოს სკოლაში, სადაც ვსწავლობ, ჩოგბურთის სექცია გახსნეს და მეც შევედი. ჩემთან ერთად ჯგუფში 7-8 თანასოფლელი მოსწავლე დადიოდა. აქ ერთი წელი ვსწავლობდი მაგიდის ჩოგბურთის თამაშს,“ – იხსენებს ანრი.
ვარჯიშის დაწყებიდან ხუთი წელი გავიდა, ქვეყნის მასშტაბით ჩატარებულ ტურნირებში დღემდე აჭარის ნაკრების სახელით ასპარეზობდა. აპრილში ეროვნულ ოლიმპიადაზე გაიმარჯვა და ნაკრების წევრის ტიტულიც მოიპოვა. ეროვნული ნაკრების 12 სპორტსმენი ზაფხულში ევროპის საერთაშორისო ჩემპიონატზე, 12-15-წლიანთა კატეგორიაში იასპარეზებს. მათ შორის ერთ-ერთი სწორედ ანრი იქნება.
აბობს, რომ მის წარმატებაში ყველაზე დიდი წვლილი სკოლის მწვრთნელს, იმედა მახაჭაძეს მიუძღვის: „სოფელში სექციის გახსნისა და ვარჯიშის დაწყებიდან ერთ წელში ჩემმა მწვრთნელმა სავარჯიშოდ ბათუმში ჩამიყვანა. მას შემდეგ ბათუმში ვვარჯიშობ. რომ არა იმედა, ვფიქრობ, დღეს ეროვნული ნაკრების წევრი არ ვიქნებოდი – ძალიან დამეხმარა და გზა მაჩვენა. ახლაც კარგი მწვრთნელი მყავს, გიორგი სარხოიანი მავარჯიშებს.“
ანრი ახლა მე-10 კლასის მოსწავლეა და სოფელ ვაიოს საჯარო სკოლაში სწავლობს. უნდა ეკონომისტი გამოვიდეს, ამიტომ მეცადინეობას ბევრ დროს უთმობს, რაც საშუალებას არ აძლევს ყველა დღე ვარჯიშს დაუთმოს – ბათუმში ჩავიდეს. ამას ყოველდღიურად მხოლოდ მაშინ ახერხებს, თუ ტურნირზე გასასვლელად ემზადება.
„ტურნირებამდე რამდენიმე დღით ადრე, თითქმის ყოველდღე, გაკვეთილების შემდეგ, ბათუმში მივდივარ, ორ საათს ვვარჯიშობ და მერე გვიან ღამით ისევ სოფელში ვბრუნდები. მეორე დღის გაკვეთილების მომზადების შემდეგ, ღამის 12 საათზე თავისუფალი ვარ და შემიძლია დავიძინო. ზოგადად, ჩოგბურთში კვირის გარდა ყველა დღეს ვვარჯიშობთ, მაგრამ ეს ყოველ დღე არ გამოდის. როცა წასვლას ვერ ვახერხებ, დილით 7 საათზე ვდგები და გაკვეთილების დაწყებამდე სკოლაში ვვარჯიშობ. რთულია ერთდროულად სპორტიც და სწავლაც, მაგრამ თუ მოინდომებ, გამოვა. ზოგი ამბობს, სოფელში თუ ცხოვრობ, ვერაფერს მიაღწეო, მაგრამ ასე არ არის, ბარიერებს სიზარმაცე ქმნის“, – ამბობს ანრი, – „რთულია ბავშვობა დაუთმო ვარჯიშს და არა თამაშს, მაგრამ ბავშვობაში ეს სირთულე ჩემმა სპორტის მასწავლებელმა, იოსებ მახაჭაძემ დამაძლევინა.“
ამბობს, რომ ყველაზე დიდი ფულადი ჯილდო, რაც დღემდე მიუღია, ბოლო გამარჯვებამ მოუტანა – 1500 ლარი და ეროვნული ნაკრების წევრობა:
„ვეცდები კარგი შედეგი ვაჩვენო ევროპის ჩემპიონატზე. რაც შეეხება მსოფლიოს, ჯერ ამაზე არ მიფიქრია, ეს ჩემი პირველი გასვლა იქნება ევრპოპის ჩემპიონატზე და რა, როგორ იქნება, წინასწარ არაფრის თქმა არ შემიძლია“.
ანრისთან ერთად, ეროვნული ნაკრების სახელით, ევროპის ჩემპიონატზე მაღალმთიანი აჭარიდან თაკო და მაგდა რიჟვაძეებიც იასპარეზებენ.
