ამბობენ, უმაღლეს ლიგაში გუნდების რაოდენობა 12-დან 16-მდე უნდა გაიზარდოსო, ზოგი იმასაც ამბობს, ექვს გუნდს დაამატებსო ბატონი დომენტი პირველი ლიგიდან. თუ ასე მოხდა, უმაღლეს ლიგაში ქობულეთის „შუქურასაც“ ვიხილავთ, თუ არა და… ოთხგუნდიანში „დინამო“ მაინც დარჩება. ამას წინათ, „დინამოს“ ერთ-ერთი წევრი შემხვდა, – „კი ვრჩებით, მაგრამ ვაი ასეთ დარჩენას, სხვის სამოწყალოდ რომ გაგვიხდა საქმეო!“… – ვერაფერს იტყვი, მართალია ის კაცი.
„დინამოს“ დირექტორმა სულხან გოგიბერიძემ პრესკონფერენციაზე განაცხადა, მილიონ სამასი ათასი ლარი გამოგვიყო მერიამ და აქედან, 700 ათასი ლარი კვლავ ბიუჯეტის ანგარიშზეა, ასე რომ, ჩემ მიმართ გამოთქმული ბრალდებები თანხის არამიზნობრივ ხარჯვაზე, უსაფუძვლოაო… ?! კარგია, როდესაც კლუბის ბიუჯეტზე ზრუნავ, მაგრამ როდესაც თანხას გაძლევენ ფეხბურთელების შეძენისა და კლუბის გაძლიერებისთვის, თან როდესაც საქმე ყოფნა-არყოფნას ეხება, მგონი, ეკონომია სრულიად უადგილოა! ეს ისე, ჩემი სუბიექტური აზრია. ვფიქრობ, სამართლიანია გულშემატკივართა მოთხოვნა, რომლებიც კლუბში ცვლილებებს ითხოვენ. მართალია, ბათუმის საკრებულომ განაცხადა, საკითხს შევისწავლით და გასაშვები თუა ვინმე გავუშვებთო, მაგრამ ერთი ნიუანსია აქ – ბათუმის „დინამო“, როგორც შპს, მერიის საკუთრებაა, ასე რომ, ცვლილებები ხელმძღვანელობაში არა საკრებულოს, არამედ უშუალოდ მერიის პრეროგატივაა. გოგიბერიძის პრესკონფერენციას ვესწრებოდი, მაგრამ ის კითხვა, რომელიც მინდოდა დამესვა, მაშინ ჩემთვის დავიტოვე და ახლა დავსვამ: – იღებს თუ არა საკუთარ თავზე პასუხისმგებლობას კლუბის ხელმძღვანელობა იმის გამო, რაც „დინამოს“ თავს მოხდა და ხდება?! მსოფლიო ფეხბურთის ისტორიაში არაერთი მაგალითია იმისა, რომ გრანდებიდანაც წასულან მხოლოდ იმის გამო, რომ გულშემატკივართა მოთხოვნა ვერ დაუკმაყოფილებიათ. პირადად მე, როგორც რიგით გულშემატკივარს, რა მინდა? – კარგი ფეხბურთი და ის, რომ ბათუმის „დინამოს“ არ ჰქონდეს სამოწყალოდ საქმე. უბრალოდ, არ ეკადრება ეს გენო მენაბდის, ვაჟა ჯოხაძის, გარი ქიქავას, ვახტანგ ქორიძის, რევაზ ჩელებაძის, ავთანდილ გორგილაძის, მალხაზ მახარაძისა და კიდევ ბევრი სხვა, კარგი, მართლა კარგი ფეხბურთელების მშობლიურ გუნდს.
P.S. ნაცმოძრაობის მიერ კომუნისტებისგან გადმოღებულ ყბადაღებულ ფრაზას გავიმეორებ, – „საქმე ლაპარაკის ნაცვლად!“. ხო მართლა, ხომ ვერ მეტყვით, სტადიონს სად აშენებენ?!
