სპორტი

„თასს ბათუმში ჩამოვიტანთ“

17.12.2012 • 1826
„თასს ბათუმში ჩამოვიტანთ“

– ჩვენს გუნდში 2000, 2001 და 2002 წლებში დაბადებული მოზარდები ირიცხებიან. თავდაპირველად ეს გუნდი სასტუმრო კომპლექს „მარინას“ ეკუთვნოდა და მას გივი ინჯია წვრთნიდა, თუმცა სათანადო ფინანსების არქონის გამო დაიშალა, სხვადასხვა ასაკის მოზარდები გააერთიანეს და გაძღოლა მე დამავალეს. ამჯერად გუნდი ბათუმის სასპორტო სკოლის სახელით ასპარეზობს და საკმაოდ წარმატებულადაც. პირველი წრე უკვე დასრულდა და იმერეთის ზონის გათამაშებაზე პირველ ადგილზე ვართ. თერთმეტი თამაში ჩავატარეთ და აქედან რვა მოვიგეთ, საერთო ჯამში 39 გოლი გვაქვს გატანილი და ქუთაისის „ქუთაისს“ ერთი ქულით ვუსწრებთ, თუმცა დარწმუნებული ვარ, რომ მეორე ტურში სხვაობა გაიზრდება და გივი ნოდიას სახელობის თასსაც ჩვენ მოვიპოვებთ და ბათუმში ჩამოვიტანთ.

 

 

კონკურენტები იოლად დაგითმობენ?

 

 

– კონკურენცია მართლაც დიდია. „ქუთაისი“, ზესტაფონის „მარგვეთი“, ხონის გუნდი… კარგი ფეხბურთელები ჰყავთ, მაგრამ პირველმა წრემ დამანახა, რომ ჩვენს ბიჭებს რეალურად შეუძლიათ თასის მოპოვება.

 

 

ბატონო ავთანდილ, 39 გოლი 11 შეხვედრაში ურიგო შედეგი არ არის. გაგვაცანით გუნდის ლიდერები

 

 

– ბექა ვერძაძე, დათა ზურაბიანი და ანრი ანდღულაძე – ყველაზე მეტი გოლი მათ ანგარიშზე მოდის. მათ გარდა გუნდში არიან გუგა ჩიკაშუა, ჯაბა ჩარკვიანი, რიკო ჭაღალიძე, თორნიკე ფუტკარაძე, ხვიჩა მელიქიშვილი, ლაშა შერვაშიძე, ნიკა გორგაძე, დათო ლემსაძე, ზურა გოგეშვილი, სოსო ლორია, ნიკა ჭანუყვაძე და სხვები. კარგი, შეკრული გუნდია. პირდაპირ გეტყვით და ეს ის ბიჭები არიან, ვინც სამომავლოდ ბათუმის „დინამოში“ გააგრძელებენ კარიერას და იმედია, სხვა, უფრო ძლიერ კლუბებშიც ითამაშებენ.

 

 

სპორტსკოლის დაფინანსებაზე ხართ?

 

 

– სპორტსკოლის ხელმძღვანელობისგან და უშუალოდ მუხრან ვახტანგაძისგან დიდი მხარდაჭერა გვაქვს, მაგრამ ჩემი მეგობრებიც გვეხმარებიან, ბიზნესმენები: გოჩა გუგუნავა და სოსო მამულაიშვილი. სწორედ მათი ხელშეწყობით შევიძინეთ ეკიპირება, ბურთები, ვგეგმავთ საწვრთნელ შეკრებებსაც ბაკურიანში. ადრე თუ მშობლები იძულებულნი იყვნენ შვილებისათვის შეეძინათ ფორმები, ბურთები და ასე შემდეგ, დღეს ეს პრობლემა მოხსნილია. მხოლოდ ზოგიერთ შემთხვევაში, ისიც თავისი სურვილით, გვეხმარებიან. კარგი იქნება, თუ მათ მაგალითს, ბიზნესმენებს ვგულისხმობ, სხვებიც მიბაძავენ. ეს ხელს შეუწყობს ბავშვთა სპორტის განვითარებას და აქ არა მარტო ფეხბურთზეა საუბარი. აქვე მინდა დავძინო, რომ ჩემი ასისტენტები არიან გივი ინჯია და ნიკო ბარამიძე.

 

 

ერთი პერიოდი თქვენ ბათუმის დინამოსაც წვრთნიდით. როგორც ყოფილი მწვრთნელი, იქნებ თქვენ აგვიხსნათ, რა სჭირს დინამოს?

 

 

– „დინამოს“ მთავარი მწვრთნელი გია გურული წარსულში ძალიან კარგი ფეხბურთელი იყო და მწვრთნელობაშიც კარგია. ეგაა, რომ ბიჭები ჯერ ახალგაზრდები არიან და შეთამაშება სჭირდებათ. დარწმუნებული ვარ, გია შეძლებს კარგი გუნდის ჩამოყალიბებას.

 

 

იქნებ წარუმატებლობა ფედერაციის ხელმძღვანელობის არასწორი მუშაობის შედეგია?

 

 

– ფაქტი სახეზეა. მხოლოდ იმის თქმა შემიძლია, რომ როდესაც ვახტანგ ქორიძეს ფეხბურთს ჩამოაშორებ და არაპროფესიონალს მოიყვან, კომენტარიც ზედმეტია. დანარჩენი გულშემატკივარმა განსაზღვროს. მალე ფედერაციის რიგგარეშე არჩევნები დაინიშნება და იმედია, როგორც ბათუმის „დინამო“, ასევე აჭარის ფეხბურთის ფედერაცია ერთი კაცის მმართველობისგან (იგულისხმება „დინამოსა“ და ფედერაციის ამჟამინდელი პრეზიდენტი სულხან გოგიბერიძე) გათავისუფლდება. ვიმედოვნებ, ამის შემდეგ აჭარაში ფეხბურთის აღმავლობაც დაიწყება. 

გადაბეჭდვის წესი


ასევე: