ზაფხული ახლოვდება და ბათუმში დამსვენებელთა რიცხვი სულ უფრო მატულობს, ბათუმელებისა და ქალაქის სტუმრებისთვის სუფთა ზღვა დასვენების აუცილებელი ნაწილია. ახლო წარსულში ზაფხულის სეზონის დაწყება წყლის გრაფიკთან და ზღვის ხარისხზე საყოველთაო მსჯელობასთან ასოცირდებოდა, ეს დრო წარსულს ჩაბარდა და დღეს ბათუმს წყალმომარაგების კომპანია „ბათუმის წყალი“ – რეაბილიტირებული მიწისქვეშა ინფრასტრუქტურით, ავტომატიზებული სამარაგო-საწნევო რეზერვუარებით და ადლიის ჩამდინარე წყლების ულტრათანამედროვე გამწმენდი ნაგებობით ემსახურება. ასობით მილიონი ლარის ღირებულების ამ ინფრასტრუქტურას უკავშირდება დღეს ბათუმის უწყვეტი წყალმომარაგება და წყალარინების საერთაშორისო სტანდარტებით დამუშავება.
[highlight color=”blue”]თენგიზ ქოქოლაძე, „ბათუმის წყლის“ გენერალური დირექტორი[/highlight]
კომპანია „ბათუმის წყალი“ დაარსებიდან დღემდე მრავალი გამოწვევის წინაშეა. მიუხედავად ამისა, ის ინფრასტრუქტურის რეაბილიტაციის პროექტით დასახულ მიზნებს წარმატებით ასრულებს. „ბათუმის წყლის“ წყალმომარაგებისა და წყალარინების თანამედროვე სისტემა მომსახურების ხარისხის მაღალ სტანდარტს აკმაყოფილებს. თანამედროვე წყალმომარაგების ქსელი ბათუმის მოსახლეობისთვის წყლის 24-საათიან უწყვეტ მიწოდებას უზრუნველყოფს. „ბათუმის წყალი“ არ აპირებს მიღწეული შედეგებით დაკმაყოფილებას და სხვა ინოვაციური სერვისების დანერგვას გეგმავს.
[highlight color=”blue”]მარიკა გვიანიძე, ადლიის წყალარინების გამწმენდი ნაგებობისა და სატუმბო სადგურების სამსახურის უფროსი[/highlight]
ადლიის წყალარინების გამწმენდი ნაგებობა 2012 წელს გერმანიის რეკონსტრუქციის ბანკის დაფინანსებით აშენდა. მშენებლობაზე 17 მილიონი ევრო დაიხარჯა. ადლიის წყალარინების გამწმენდი ნაგებობის ანალოგი ამიერკავკასიის რეგიონში რთულად მოიძებნება. ყოველდღიურად გამწმენდ ნაგებობაში 60 000 მ3 წყალი შემოედინება, რომლის გაწმენდა ეტაპობრივად, რამდენიმე ფაზას გადის. გაწმენდილი წყალი ზღვაში, სატუმბი სადგურის მეშვეობით, 1კმ და 100 მეტრის მანძილზე, 40 მეტრ სიღრმეში ჩაედინება. გაწმენდილი წყლის ყოველდღიურ მონიტორინგს ადლიის წყალარინების გამწმენდი ნაგებობის ლაბორატორია, ევროკავშირის სტანდარტის – ზღვაში ჩასაშვები გაწმენდილი წყლის ზღვრული ნორმების თანახმად აწარმოებს.
ადლიის წყალარინების გამწმენდი ნაგებობის სათანადო ფუნქციონირებას უდიდესი დანიშნულება აქვს ზღვის ეკოსისტემის დაცვისა და აჭარის ზღვისპირა ზოლის სისუფთავის შენარჩუნების თვალსაზრისით. გამწმენდი ნაგებობის ლაბორატორია და შავი ზღვის მონიტორინგის ცენტრის უახლესი კვლევები მოწმობენ, რომ 2007 წლიდან დღემდე შავი ზღვის დაბინძურების ხარისხი რადიკალურად შემცირებულია.
[highlight color=”blue”]ლანა კეკუტია, „ბათუმის წყლის“ ქიმიურ-ბაქტერიოლოგიური ლაბორატორიის უფროსი[/highlight]
„ბათუმის წყლის“ ქიმიურ-ბაქტერიოლოგიური ლაბორატორია სასმელ, ზედაპირულ და მიწისქვეშა წყლებს იკვლევს. სასმელი წყლის ხარისხის მუდმივი, ლაბორატორიული შემოწმება წყლის სათავე ნაგებობების, რეზერვუარებისა და ქალაქის ქსელის სხვადასხვა წერტილიდან აღებულ სინჯებზე ტარდება.
„ბათუმის წყლის“ ლაბორატორია ტექნიკური აღჭურვილობისა და თანამედროვე სტანდარტებზე ორიენტირების თვალსაზრისით, ერთ-ერთი საუკეთესოა საქართველოში. საქართველოს აკრედიტაციის ერთიანი ეროვნული ორგანო – აკრედიტაციის ცენტრი, „ბათუმის წყლის“ ლაბორატორიაში ყოველწლიურად გეგმიური მონიტორინგის სამუშაოებს ახორციელებს. ლაბორატორია უახლესი აპარატურითაა აღჭურვილი, სასმელი წყლის ხარისხის კონტროლი უახლესი გერმანული და ამერიკული (HAH და IDEXX) მეთოდით ტარდება, რაც გვაძლევს შესაძლებლობას, უმოკლეს ვადაში დავადგინოთ სასმელი წყლის ხარისხი. ეს მეთოდები საქართველოში პირველად ჩვენ დავნერგეთ. ინფორმაცია სასმელი წყლის ხარისხის შესახებ სრულიად გამჭვირვალეა და საზოგადოებას მედიის საშუალებით პერმანენტულად ვაწვდით.
[highlight color=”blue”]რამაზ ასანიძე, „ბათუმის წყლის“ გენერალური დირექტორის მოადგილე ტექნიკურ საკითხებში[/highlight]
ამჟამად ბათუმში წყალმომარაგებისა და წყალარინების სისტემის რეაბილიტაციის მე-3 ფაზა მიმდინარეობს. აღნიშნული ფაზის ფარგლებში, ბათუმის უბნებში: ჭაობში, გოროდოკში, ბენზესა და ასევე, ბათუმს ახალშემოერთებულ ტერიტორიებზე, ჩატარდება წყალმომარაგებისა და წყალარინების სისტემის სრული რეაბილიტაცია.
რეაბილიტაციის მესამე ფაზაში დასრულდება ჩაქვის წყლის რეზერვუარის მშენებლობა, რომელიც ფუნქციონირებას უახლოეს თვეებში დაიწყებს. ახალი რეზერვუარი 2500 მ3 მოცულობისაა, მისი მშენებლობისთვის 960 000 ევრო დაიხარჯა. რეზერვუარი ჩაქვის დასახლების წყლით უწყვეტ მომარაგებას უზრუნველყოფს.
რეაბილიტირებული წყალმომარაგებისა და წყალარინების თანამედროვე სტანდარტებზე დაფუძნებულ სისტემას ექსპლუატაციას კომპანია „ბათუმის წყალი“ გაუწევს.
[highlight color=”blue”]მათიას ჰიტცელი, გერმანული საკონსულტაციო კომპანია MACS-ი: „ბათუმის წყალი“ საუკეთესო წყალმომარაგების კომპანიაა არა მხოლოდ ქვეყანაში, არამედ მთლიანად კავკასიის რეგიონში, რასაც არაერთი საერთაშორისო ჯილდო ადასტურებს“[/highlight]
თანამშრომლობა 2005 წლიდან, საქართველოსა და გერმანიის მთავრობის პარტნიორობის საფუძველზე დავიწყეთ. საწყის ეტაპზე პროექტის ანალიზი გავაკეთეთ, თუ როგორ უნდა მომხდარიყო წყლის სისტემის რეაბილიტაცია მაშინ, როცა არც შესაბამისი ინფრასტრუქტურა არსებობდა და არც წყალმომარაგება იყო უწყვეტი. ცვლილებებისთვის საფუძველი მოვამზადეთ, გავაანალიზეთ ძველი სისტემის მუშაობის შესაძლებლობა და დავინახეთ, რომ ეს სისტემა კარგად არ მუშაობდა. არც მომსახურების სისტემა არსებობდა და არც წყლის მიწოდება ხდებოდა ნორმალურად. მოკლედ, მთლიანი სისტემა გაუმართავი იყო როგორც ტექნიკურად, ისე მენეჯერული და კონცეპტუალური თვალსაზრისით.
ამ დროს ჩვენ შევიმუშავეთ იდეა, თუ როგორ უნდა შეგვექმნა ყველაფერი თავიდან. ბათუმის მუნიციპალიტეტმა გაითვალისწინა ჩვენი რეკომენდაცია და 2006 წელს „ბათუმის წყალი“ დააფუძნა. პერსონალურად მე და ასევე მთელი ჩემი გუნდი, „ბათუმის წყლის“ მენეჯმენტს ვეხმარებოდით, როგორც ეკონომიკურ და კომერციულ, ასევე ტექნიკურ საკითხებში. დღეს უკვე თამამად შემიძლია ვთქვა – „ბათუმის წყალი“ საუკეთესო წყალმომარაგების კომპანიაა არა მხოლოდ ქვეყანაში, არამედ მთლიანად პოსტსაბჭოთა სივრცეში, რასაც მრავალი საერთაშორისო ჯილდო ადასტურებს. „ბათუმის წყლის“კონცეფციის მთავარი ქვაკუთხედი მომხმარებელზე ორიენტირებაა. ეს არ იყო იოლი, რადგან მომხმარებლებზე ზრუნვა სრულიად უცნობი იდეა იყო მაშინ, მაგრამ წლების განმავლობაში მცირე ნაბიჯებით მნიშვნელოვან შედეგს მივაღწიეთ მომხმარებლებთან კომუნიკაციის კუთხით. პირველი კონცეპტუალური სამუშაო თანამშრომელთა გადამზადებას, ცნობადობის გაზრდას და მნიშვნელოვან მხარეებთან კომუნიკაციის გაუმჯობესებას გულისხმობდა. მომხმარებლებს ყველაფრის შესახებ ვაწვდით ინფორმაციას, რომ მაგალითად, ტექნიკური სამუშაოების გამო რამდენიმე საათით ვერ მიიღებენ წყალს. ადრე კი ასე არ ხდებოდა და აბონენტის ინფორმირებულობაზე ზრუნვა სრულიად უცხო იყო.
ბევრი ვიმუშავეთ ცხელ ხაზზე, რომელზეც ადამიანები ძირითადად პრეტენზიებით ან ტექნიკური მომსახურების გაწევის მოთხოვნით რეკავენ. გადავამზადეთ ოპერატორები, დავნერგეთ ქოლცენტრის ფუნქციონირებისთვის აუცილებელი სტანდარტები და ყველაფერს ვაკეთებთ იმისათვის, რომ თითოეულ აბონენტთან კომუნიკაცია ეფექტურად განხორციელდეს.
წყალმომარაგების ინფრასტრუქტურის რეაბილიტაციის, საერთაშორისო გამოცდილების გაზიარებისა და უწყვეტი გადამზადების საფუძველზე „ბათუმის წყალი“ სულ უფრო სწრაფი ნაბიჯებით მიიწევს წინ და მომხმარებელზე მაქსიმალურად ორიენტირებული კომპანია ხდება.