მთავარი

გიორგი მაისურაძე: ლენინის და ბრეჟნევის პორტრეტები ახლა ხატებით უნდა ჩაანაცვლონ [ვიდეო]

02.06.2016 • 2114
გიორგი მაისურაძე: ლენინის და ბრეჟნევის პორტრეტები ახლა ხატებით უნდა ჩაანაცვლონ [ვიდეო]

„მე შეიძლება გამიმართლა იმაში, რომ გარდატეხას მოვესწარი – დავიბადე საბჭოთა კავშირში და მახსოვს, კაბინეტებში ლენინის ხატებად ქცეული პორტრეტები. სინამდვილეში არც ის ლენინი არავის არ აინტერესებდა, არც წაეკითხათ არც მარქსი და არც ლენინი… მაპატიეთ და ფეხებზე ეკიდათ. ახლა სწორედ ის ადამიანები არიან, რომლებმაც იციან, რომ მაშინ ასე იყო საჭირო და ახლა ასეა საჭირო – ლენინის და ბრეჟნევის პორტრეტები ახლა ხატებით უნდა ჩაანაცვლონ. მათ არც მაშინ სწამდათ იმის და არც დღეს სწამთ ამისა. ორივე შემთხვევაში თვალთმაქცი, უსინდისო და ფარისეველი ადამიანია ვინც ამას აკეთებს. ხატი თუ გინდა, ამისთვის სალოცავი ადგილია ეკლესიაა და წადი, რატომ უნდა დაკიდო კაბინეტში, სადაც ქრთამებს იღებ და განკარგულებებს გასცემ?! ანუ დღესაც გჭირდება, რომ ხატი იყოს ის ავტორიტეტი, რომელიც შენს გარყვნილებაში, უკანონობასა და უსინდისობაში დაგიცავს, არა?! ზუსტად ისევე, როგორც ლენინის პორტრეტი ჰქონდა ჩამოკიდული და ფარისევლობდა: „როგორ შეიძლება მე დამიჭიროს ვინმე, ან რევიზია მოვიდეს, მე ხომ ჭეშმარიტი კომუნისტი ვარ!“, – ამბობდა ის, ამ დროს კი მამაძაღლი და მატყუარა იყო. ზუსტად ასეთივე მატყუარაა, ვინც თვალებში ნაცარს გვაყრის და გვეუბნება: „როგორ მე მორწმუნე ვარ, როგორ შეიძლება არ მენდოთ? ხატები მიკიდია…“ აი, ამ ფონის შექმნა არის ჩვეულებრივი ტესტი სიცრუისა“, –  ასე გამოეხმაურა ფილოსოფოსი, ილიას სახელმწიფო უნივერსიტეტის პროფესორი, გიორგი მაისურაძე საჯარო დაწესებულებებში რელიგიური ატრიბუტიკისა და სიმბოლიკის განთავსების საკითხს შეხვედრაზე, რომელიც ბათუმის შოთა რუსთაველის სახელმწიფო უნივერსიტეტში 29 მაისს შედგა. შეხვედრის თემა იყო: „სეკულარიზმი და მისი კრიზისი თანამედროვე საქართველოში“.

პირველ ნაწილში გიორგი მაისურაძემ მოხსენება წაიკითხა, ხოლო შეხვედრის მეორე ნაწილი დისკუსიას დაეთმო. დაწყებამდე, მომხსენებელმა აღნიშნა, რომ სეკულარიზმთან დაკავშირებული რიგი პრობლემები ტერმინის არასწორი განმარტებიდან მომდინარეობს, შესაბამისად, მოხსენების პირველი ნაწილი ტერმინის ეტიმოლოგიისა და მისი დაფუძნების ისტორიას დაეთმო. შემდეგ ნაწილში საუბარი თანამედროვე ქართულ გამოწვევებზე იყო. დისკუსიისას კითხვები შეეხო რელიგიური ატრიბუტიკის საჯარო დაწესებულებებში განთავსების, პოლიტიკურ საქმიანობაში რელიგიური ინსტიტუციის გამოყენებისა და სხვა, რიგ ტენდენციებს, რომლებიც სეკულარიზმს არღვევს.

დისკუსია დაიგეგმა პროქტის “ახალგაზრდებში დემოკრატიული იდეების პოპულარიზაცია” ფარგლებში, დემოკრატიის მხარდამჭერი ნაციონალური ფონდის [NED] დაფინანსებით.

გადაბეჭდვის წესი


ასევე: