საზოგადოებრივი მაუწყებლის აჭარის ტელევიზიის ბორდის წევრი ირაკლი დარცმელიძე, საქართველოს ევროკავშირთან ვიზალიბერალიზაციას საკუთარ ფეისბუკ გვერდზე ასე გამოეხმაურა:
„მე ვარ ქართველი და მაშასადამე ვარ ევროპელი, ხშირად მესმის ეგ ფრაზა. მე ასე ვიტყვი, მე ვარ ქართველი და ამით ყველაფერი ნათქვამია. მ…ტ ლგბტ ევროპა. შეშფოთებული ამერიკის და ვითომ ერთმორწმუნე რუსეთის დედაც…“
საზოგადოებრივი მაუწყებლის აჭარის ტელევიზიის ბორდში, ირაკლი დარცმელიძის კანდიდატურა „ნაციონალური მოძრაობის“ კვოტით იყო წარდგენილი, თუმცა აჭარის უმაღლესმა საბჭომ მის კანდიდატურას მხარი არ დაუჭირა.
ბორდში „ნაციონალური მოძრაობის“ კვოტით წარდგენილმა კიდევ ერთმა კანდიდატმა, ბეჟან გობაძემ და ირაკლი დარცმელიძემ სასამართლოს მიმართეს. ირაკლი დარცმელიძის უფლებამოსილება უმაღლესმა საბჭომ სასამართლოს გადაწყვეტილების შემდეგ, 2015 წლის მაისში ცნო.
როგორც „ბათუმელებისთვის“ არის ცნობილი, ირაკლი დარცმელიძის კანდიდატურა თავის პარტიას – „ნაციონალურ მოძრაობას“ სწორედ უმაღლესი საბჭოს წევრმა პეტრე ზამბახიძემ შესთავაზა. პეტრე ზამბახიძე ამბობს, რომ ის ევროპული ღირებულებების მატარებელია და მისთვის მსგავსი განცხადებები მიუღებელია.
„მე მოვუწოდებ ხოლმე ჩემს კოლეგებს, უმაღლესი საბჭოს წევრებს, რომ სოციალურ ქსელებში არ გააკეთონ კერძო შეფასებები, რადგან კერძო შეფასებები არ არის პოლიტიკოსის საქმე და არის დამღუპველი ქვეყნისთვის. რაც შეეხება დარცმელიძეს, მე არ ვიცი ნამდვილად მან გამოაქვეყნა თუ არა ეს პოსტი“.
