დედობა როგორც პოლიტიკური აქტი -დისკუსია ბათუმში

26 ოქტომბერს, ხუთშაბათს, 18:30 სთ-ზე, ბათუმში, „თანამედროვე ხელოვნების სივრცეში“, ჰაინრიჰ ბიოლის ფონდის ორგანიზებით, გაიმართება დისკუსია – „დედობა როგორც პოლიტიკური აქტი“.

„პატრიარქალურ კულტურაში დედობა განსაზღვრულია, როგორც საშინაო და კერძო პრაქტიკა, რომელიც, ძირითადად, გრძნობებისა და ემოციების ტერმინებით ხასიათდება. ამგვარი ჩარჩო უგულვებელყოფს დედის სპეციფიკური აზროვნებისა და დედობის პოლიტიკური ზეგავლენის შესაძლებლობებს. ამავდროულად, საშინაო სივრცეში ჩაკეტვა დედების ერთმანეთისგან იზოლირებასაც უწყობს ხელს და მათი ურთიერთსოლიდარობის შესაძლებლობებს ზღუდავს,“-ნათქვამია პრესრელიზში.

მომხსენებელი იქნება პროექტის ფემინისტი დედის დღიურები / Feminist Mother’s Diaries ავტორი, გენდერის მკვლევარი თამთა თათარაშვილი.

დისკუსიის ძირითადი ხაზი იქნება  –  როგორია დედობა, როგორც ინსტიტუტი და რამდენად ჰგავს ის დედების რეალურ გამოცდილებას? აღნიშნული კომპონენტი წარმოდგენილი იქნება პროექტის ფარგლებში შეგროვებული ზეპირი ისტორიების საფუძველზე;

დედობასთან დაკავშირებულ რა მითებს ანგრევს ფემინისტური კრიტიკა; ვინ არის ფემინისტი დედა და რაში მდგომარეობს დედობის პოლიტიკური მნიშვნელობა?

დისკუსიაზე დასწრება თავისუფალია.

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com