მეწყერმა ქედაში საცხოვრებელი სახლი წაიღო

ქედაში, სოფელ ოტომბერში, გუშინ, საღამოს მთიდან ჩამოსულმა მეწყერმა ომარ ბაჯელიძის საცხოვრებელი სახლი და ბოსელი წაიღო ოთხ სულ საქონელთან ერთად. გვიან ღამით მეწყერი განვითარდა მეძიბნა – აგითის დამაკავშირებელ სასოფლო გზაზეც – სტიქიამ გზა მთლიანად წაიღო.

ქედის გამგებლის, დავით დუმბაძის ინფორმაციით, სტიქიის შედეგად არავინ დაზიანებულა. ,,მიწის დიდი მასა ჩამოვიდა, რამაც საცხოვრებელი სახლი და ბოსელი მთლიანად წაიღო, სტიქიის შედეგად არავინ დაზიანებულა, ბაჯელიძეების ოჯახი სამინისტროს განსახლების პროგრამაში იყო ჩართული და სახელმწიფოსგან 25 000 ლარი რამდენიმე თვის წინ მიიღო, თუმცა ოჯახს საცხოვრებელი სახლი არ შეუძენია, ამ დროისთვის ოჯახი უსაფრთხო ადგილზეა გადაყვანილი,” – ამბობს დავით დუმბაძე.

დამატება: მოგვიანებით „ბათუმელებს“ ბაჯელიძეების ოჯახიდან დაუკავშირდნენ და განუცხადეს, რომ მათ სახელმწიფო განსახლების პროგრამით არ უსარგებლიათ და ამ პროგრამით გათვალისწინებული  თახა, 25 000 ლარი არ აუღიათ. 

„რადგან 25 000 ლარით ვერაფერს შევიძენდით, ამ თანხის მიღებაზე უარი განვაცხადეთ, საჭირო დოკუმენტებიც არ წარგვიდგენია” – ამბობს გაბრიელ ბაჯელიძე.

 

 

 

ნეტგაზეთის მასალების სხვა გამოცემებში გადაბეჭდვის წესი


ავტორი