ერთი შეხედვით, ტურისტებისგან უცებ დაცლილ ქალაქზე სევდიანი არაფერია. ბულვარის კაფეში მთქნარებით უყურებს მიმტანი გოგო თურქულ სერიალს. შემოდგომის წვიმების სეზონი იწყება, ზღვა საშიშრად ტყვიისფერდება. შეფუთულია ატრაქციონები. ქალაქი ათასობით დამსვენებელმა დატოვა. სამუშაო საათებში ყველაზე ხალხმრავალ ქუჩებშიც კი კანტიკუნტად ნახავთ ადამიანებს. სამაგიეროდ წვიმიან ბულვარში შეგხვდებიან შეყვარებულები, მზე და წვიმა თანაბრად რომ უხარიათ.
პლაჟზე ცარიელი შეზლონგები დარჩა, ბუნგალო წვიმისა და ქარისგან გაიქუცა, მაგრამ უცებ გვერდით ჩაგიქროლებს წელს ზევით შიშველი, ყოჩაღი ბაბუ, რომელიც თქეშს არ ეპუება და სირბილით აპირებს სანაპირო ზოლის დალაშქვრას. შეიძლება ამ დროს კამერა დაგიჯდეს და ვერ გადაიღო, მაგრამ გრძნობ, რომ ამ ქალაქს კარგი იუმორი აქვს და არასდროსაც არ იწყენს, უბრალოდ თვითონაც ცოცხალია, ზაფხულის სადღეღამისო მხიარულებითა და კაშკაშა ფერებით იღლება და ადამიანივით სჭირდება სიმშვიდე და დასვენება.
მობუზულია პატარა პალმაც. საზღვაო სეზონი დასრულდა – უფლება აქვს უღიმღამოდ გამოიყურებოდეს და მომავალ ზაფხულამდე უხასიათოდ იყოს.
დაცარიელებული სკამები
ბამბუკები
ნეკერჩხალი
დაცარიელებული ხეივანი
წვიმიანი ბულვარი
სუვენირების გამყიდველი მოქუფრულ ქალაქს შემორჩენილ ტურისტებს აყოლებს თვალს და მშვიდად ეწევა
ესეც ტურისტები. დროზე უნდა გაასწრონ წვიმას ბულვარიდან.
ცარიელი ღია კაფეების ყველაზე ხშირი სტუმარი წვიმაა.
ტურისტები მყუდრო, გადახურულ ადგილს პოულობენ და წვიმა აღარ აშინებთ. ერთნაირი საწვიმრებით მოივლიან ქალაქს.
რას ყიდდნენ ამ თეთრი დახლიდან? სასმელს, სუვენირებს თუ ნაყინს?
ეშმაკის ბორბალი მარტო დარჩა.
ბატუტის გაბერილი, ჯადოსნული სასახლე მთელი ზაფხული ართობდა პატარებს. ახლა კი წარსულის ფერად, მაგრამ მტვრით დაფარულ მოგონებასავით ჩაფუშულა ზღვის პირას.
ნიჟარებს და ფერად კენჭებს აგროვებენ სანაპიროზე, მერე რა რომ წვიმს!
მოულოდნელი ყვითელი ქოლგა მოქუფრულ ნავსადგურში
პალმები ქარში
ეს ატრაქციონი ჯერ არ შეუფუთავთ. იქნებ კიდევ გამოანათოს შემოდგომის მზემ.
მეთევზეებისთვის ამინდს მნიშვნელობა არ აქვს. საწვიმარი, ქოლგა, ცოტა არაყი და წასახემსებელი.
მთავარია თევზი მოდის – ყველაფერი კარგადაა.
როცა ზაფხული მთავრდება, ქუჩები ცარიელდება და ტურისტები პლაჟს ტოვებენ, უამინდობის მიუხედავად, სანაპიროსთან რჩებიან ძველი გემები და მეთევზეები.
2017 წლის ტურისტული სეზონი ბათუმში ნელ-ნელა მთავრდება.