მოშიმშილე პატიმარმა მე-8 დაწესებულებიდან სუიციდს მიმართა – ის გადაარჩინეს

 

დღეს, 16 თებერვლის მონაცემებით, მერვე დაწესებულებაში შიმშილობს 22 პატიმარი – ისინი, ვისაც უვადო პატიმრობა აქვთ მისჯილი. შიმშილობის შესახებ ინფორმაციას “ბათუმელებს” პატიმრები აწვდიან. 

 

“მოშიმშილე ბ.ს.-მ დღეს თვითმკვლელობა სცადა – გასეირნების ოთახში თოკზე თავი ჩამოიკიდა, მაგრამ თოკი ჩამოწყდა… ხმაური გაიგონეს ადმინისტრაციის თანამშრომლებმა და შეძლეს მისი  გადარჩენა, ამჟამად ბ.ს მძიმე ფიზიკურ და  ფსიქოლოგიურ მდგომარეობაშია”, – “ბათუმელებმა” ეს შეტყობინება მერვე დაწესებულებაში განთავსებული პატიმრის გიორგი გელაძის დისგან მიიღო. 

 

სასჯელაღსრულებისა და პრობაციის სამინისტროს პრესსამსახურის თანამშრომელმა “ბათუმელებს” უთხრა, რომ ინფორმაცია სინამდვილეს შეესაბამება და სამინისტრო წერილობით განცხადებას რამდენიმე წუთში გაავრცელებს.

 

პატიმარი გიორგი გელაძე “ბათუმელებთან” საუბრისას ამბობს, რომ ოთხშაბათს, 11 საათზე ქუთაისში, პარლამენტის წინ გამაფრთხილებელი აქცია გაიმართება, ისინი საკანონმდებლო ორგანს წევრებს 2012 წლის ამნისტიის კანონის გადახედვას სთხოვენ და ამ მოითხოვნით უკვე 22-ე დღეა შიმშილობენ. 

ნეტგაზეთის მასალების სხვა გამოცემებში გადაბეჭდვის წესი


ნათია როყვა