ბათუმში ფეხით მოსიარულეთა ხიდის აშენების სურვილი არავინ გამოთქვა

ბათუმში, თამარ მეფის გამზირზე [პლაჟსა და სარკინიგზო ხაზს შორის] გადასასვლელი, ფეხით მოსიარულეთა ხიდის მშენებლობის სურვილი არავინ გამოთქვა, შესაბამისად, ბათუმის მერიის მიერ გამოცხადებული ტენდერი არ შედგა. ხიდის აშენებისთვის ქალაქის ბიუჯეტიდან 186 ათას 100 ლარია გამოყოფილი.

ქალაქის მერიამ ხიდის მშენებლობაზე ტენდერი განმეორებით გამოაცხადა. სატენდერო ფასი კვლავ 186 100 ლარია. მშენებლობა 2017 წლის 25 დეკემბრამდე უნდა დასრულებულიყო, ახალი ტენდერის პირობის მიხედვით კი, მშენებლობა ხელშეკრულების გაფორმებიდან 180 დღეში უნდა დასრულდეს. ხელახალ ტენდერში წინადადებების მიღება 2 ოქტომბერს დასრულდება.

ლითონის ხიდი, რომელიც ბარცახანაში, ლორთქიფანიძის ქუჩის პირდაპირ, უნდა აშენდეს, არაადაპტირებული იქნება.

ხიდის პროექტი მერიამ კომპანია „ხობი 2005“-სგან შეისყიდა. კომპანიაში „ბათუმელებს“ უთხრეს, რომ „კონკრეტულ ადგილზე ასეთი ხიდის დაპროექტება/აშენება შეუძლებელია“. ამის ერთ-ერთ მიზეზად კი კომპანიაში აქ გამავალი სარკინიგზო ხაზი დაასახელეს: „მაქ ეტლით მოსარგებლეთათვის ლიფტის დამონტაჟებაც კი ვერ მოხერხდება“.

ბათუმის მერიის კეთილმოწყობის სამსახურის ხელმძღვანელმა, თენგიზ პეტრიძემ კი „ბათუმელებთან“ განაცხადა, რომ ადაპტირებული ხიდის დაპროექტება თავიდანვე განიხილებოდა, თუმცა სარკინიგზო ხაზის გამო საპროექტომ საბოლოოდ უარი თქვა ლიფტის მოწყობაზეც: „ხიდი დაპროექტდა ასე – რკინიგზის ლიანდაგებს გადადის ქვეითი ფეხით, როგორც ახლა და შემდეგ ადის ხიდის კიბეებზე. ამ ხიდის საშუალებით კი გადავდივართ საავტომობილო მაგისტრალზე და არა რკინიგზაზე“.