საკონსტიტუციო

კერძო დაცვის სამსახურები შსს-ს და პარლამენტის წინააღმდეგ

შინაგან საქმეთა სამინისტროს და პარლამენტს კერძო დაცვის სამსახურები საკონსტიტუციო სასამართლოში ედავებიან. მოსარჩელეები არიან შპს „გიგანტი სექიურითი“ და „იუნაითედ სექურითი“.

ისინი „კერძო დაცვითი საქმიანობის შესახებ“ კანონის ჩანაწერს ასაჩივრებენ, რომელიც სსიპ დაცვის პოლიციის დეპარტამენტს ანიჭებს უფლებამოსილებას, რომ იმოქმედოს კერძო დაცვითი ორგანიზაციების საქმიანობაზე, როგორც კონტროლის განმახორციელებელმა ორგანომ, ხოლო მეორეს მხრივ, თავად განახორციელოს დაცვითი საქმიანობა. გასაჩივრებულია შინაგან საქმეთა მინისტრის ბრძანებაც, რომელიც სახელმწიფო დაცვის სამსახურის საქმიანობის წესებს არეგულირებს.

კერძო დაცვის სამსახურები მიიჩნევენ, რომ კერძო დაცვის საქმიანობაზე სახელმწიფო მხრიდან უხეში ზემოქმედება ხორციელდება, „რაც შეუძლებელს ხდის ამ სფეროში თავისუფალი და კონკურენტუნარიანი გარემოს არსებობას“.

მათი აზრით, სახელმწიფო დაცვის დეპარტამენტს არ უნდა ჰქონდეს დაცვითი საქმიანობის განხორციელების უფლება, თუკი მისი ფუნქციაა კერძო დაცვის სამსახურების კონტროლი.

საქმეს არსებითად საქართველოს საკონსტიტუციო სასამართლოს მეორე კოლეგია განიხილავს.

ნეტგაზეთის მასალების სხვა გამოცემებში გადაბეჭდვის წესი
ავტორი