IMG_20170905_183745

მეუფე დიმიტრი: კითხვები თუ მაქვს პროკურატურასთან არ ნიშნავს რომ დეკანოზი უცოდველია

ბათუმისა და ლაზეთის მიტროპოლიტმა დიმიტრი შიოლაშვილმა, ცოტა ხნის წინ, დეკანოზ გიორგი მამალაძის განაჩენთან დაკავშრებით პრესკონფერენცია გამართა, სადაც თქვა, რომ იგი დეკანოზ მამალაძეს გარკვეულწილად  დამნაშავედ მიიჩნევს, მაგრამ ამავდროულად ციანიდის საქმესთან დაკავშირებით ძალიან ბევრი შეკითხვები აქვს.

„მე რომ კითხვები მაქვს პროკურატურასთან არ ნიშნავს რომ დეკანოზი მამალაძე უცოდველია, ამას ვერ ვიტყვი… მე ვერ უარვყოფ, რომ დეკანოზი მამალაძე ეძებდა ციანიდს და იქ ჩანს კიდევაც ეს… შემდეგ ახსენებს შორენასა და სხვა ადამიანებს, და შემდეგ როცა დაინახეს, რომ ის მოიჩქაროდა გერმანიაში და იქ იყვნენ ადამიანები, ვისაც ის ახსენებს ამ ციანიდთან ერთად, მოხდა მისი ასეთი ფორმით განეიტრალება, – ამბობს ის – მე სულ სხვა ვერსია მივიღე, თუ როგორ ჰქონდა მას შენახული ეს ციანიდი. თუ გახსოვთ, პირველი ვერსია იყო, რომ მას ციანიდი შენახული ჰქონდა ფეხსაცმელების საწმენდში. მეორე იყო ჰიგიენურ ჭურჭელში (დეზოდორში), რაც მერე გამყარდა. პირველი, რაც მე შევიტყე, არის ის, რომ მას ქარხნულად ჰქონდა ჩაკერებული ჩანთაში ციანიდი,“ – ამბობს მიტროპოლიტი დიმიტრი შიოლაშვილი. ინფორმაციის წყაროს დასახელებიდან მეუფე დიმიტრიმ თავი შეიკავა.

მეუფე დიმიტრიმ პრესკონფერენციაზე თქვა, რომ იგი რამდენიმე დღის წინ პატრიარქსაც ესაუბრა. „პატრიარქის აზრით, დეკანოზი გიორგი ამის ჩამდენი და გამკეთებელი არ არის, რაც მის ოჯახის წევრებსაც უთხრა. თავისთავად, პატრიარქი ბევრად აღმატებულია ჩვენზე. სასამართლო გადაწყვეტილების შემდეგ საუბარი არ გვქონია,“ – თქვა მან.

თავად დეკანოზი გიორგი მამალაძე ბრალს არ აღიარებს. მისი თქმით, ციანიდის ყიდვა თავად შორენა თეთრუაშვილმა სთხოვა.

დღევანდელ სასამართლო პროცესს არ ესწრებოდა დეკანოზი გიორგი მამალაძე, მან სასამართლოს გადაწყვეტილების მოსმენაზე უარი თქვა.

სასამართლოს გადაწყვეტილების გამოცხადებას დღეს არ ესწრებოდა არც მიტროპოლიტი დიმიტრი. „ჩემთვის ძალიან ახლო ადამიანი არის კომატოზურ მდგომარეობაში და მე ეს ორი დღეა ვიმყოფები მის გვერდით. ის არის ჩემი შვილების დედა“, – დასძინა მიტროპოლიტმა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან