კედელი აივნის წინ – ბათუმის არქიტექტურა დღეს

ბათუმში, ფარნავაზ მეფის ქუჩაზე, ახალი სახლის აივნები მეორე მაღლივი სახლის კედელს ესაზღვრება. ამ ბინაში მცხოვრები კი აივნიდან ხედის ან ეზოს ნაცვლად  ყრუ კედელს დაინახავს. ახალი სახლის აივნებზე დამონტაჟებული გამჭვირვალე კარიდან კი არათუ მზის სხივი, დღის სინათლეც კი ვერ შეაღწევს.

დააკვირდით ფოტოს:

ამ ფოტოზე ჩანს, რომ ორ კედელს შუა ღია აივნები და ფანჯრები მოექცა. ნაცრისფერ სახლში ჯერ არავინ ცხოვრობს , მისი მშენებლობა ახალი დასრულებულია. მოპირდაპირე სახლში კი უკვე წლებია ცხოვრობენ, ამ სახლის ბინადრებმა „ბათუმელებს“ უთხრეს, რომ ჯერ მათი სახლი აშენდა, შემდეგ კი ნაცრისფერი სახლი მოპირდაპირედ: „ ნეტა არ აშენებულიყო“ – ამბობენ ისინი.

ფოტოზე, თუ კარგად დააკვირდებით, დაინახავთ იმასაც, რომ ნაცრისფერი სახლის აივანზე გადის გვერდითა სახლის გაზგამათბობლებისა და კონდიციონერების დაბოლოებები, საიდანაც, როგორც წესი, ნაფილტრი ჰაერი ან გაზგაყვანილობის გამონაბოლქვი გაედინება, რაც მომიჯნავე ბინაში სუფთა ჰაერის აივნიდან მოხვედრის ისედაც მცირე შანსს სულ უფრო ამცირებს.

ნაცრისფერი სახლის მშენებლობაზე ნებართვა 2008 წელს გაუციათ. ეს სახლი მშენებელს ნახევრად აუშენებია, წინასწარ გაუყიდია ჯერ კიდევ აუშენებელი ბინები და შემდეგ სახლის მშენებლობა არ დაუსრულებია:

„მომავალი მესაკუთრეები დავრჩით პასუხების გარეშე. დიდი ხნის ლოდინის შემდეგ ბინა ჩვენ თვითონ დავასრულეთ. მოპირდაპირე სახლი კი ჩვენს ტერიტორიაზე ააშენეს, ვიდრე ჩვენი სახლის მშენებლობა შეჩერებული იყო. ცხადია ჩვენს სახლზე ადრე აშენდა მათი სახლები, რადგან ჩვენი მშენებელი გაუჩინარდა, ჩვენ კი დაწყებული პროექტის მიხედვით ავაშენეთ სახლი, ამიტომაც არის, რომ აივნები სხვა სახლის კედელს ესაზღვრება“ – უთხრა მშენებელმა მერაბ ფარტენაძემ „ბათუმელებს“.

საერთო ჯამში კი ორივე სახლის მშენებლობაზე ნებართვა ბათუმის მერიამ გასცა.

დღეს მოქმედი კანონმდებლობით ღიობის წინ ღიობის მშენებლობა არ შეიძლება, რაც იმას ნიშნავს, რომ მეზობელმა სხვა ბინის ფანჯარაში შეხედვა ვერ უნდა შეძლოს, თუმცა, ბათუმში ბოლო წლებშიც  ბევრი მრავალბინიანი სახლი აშენდა, სადაც ეს პრინციპი დარღვეულია, თანაც მათ შორის მანძილი ძალიან მცირეა. ამასთან დაკავშირებით „ბათუმელებს“  ერთ-ერთი  მოქალაქე, რომელიც მსგავს სახლში ცხოვრობს, მოუყვა, რომ სახლში თევზი მიიტანა, რაც მეზობელმა ფანჯრიდან დაინახა: „ … დაურეკა დედაჩემს თევზს, რომ შეწვავ არ დაგავიწყდეო“ – ამ მოქალაქემ სახელის გამხელა არ ისურვა.

ამავე თემაზე: ქალაქი შენი ფანჯრიდან