ckaro

ბუთურაულის წყლის ლაბორატორიული კვლევა ჯერ არ ჩატარებულა

შუახევში, სოფელ ბუთურაულში აღმოჩენილი წყლის სამკურნალო თვისებები ლაბორატორიულად ჯერ არ დადასტურებულა. წყალთან ცოცხალი რიგები არ წყდება. მათ სჯერათ, რომ ბუთურაულის წყალი დიაბეტს კურნავს. „ბათუმელებმა“ ვერ მოიკვლია სამთავრობო უწყება, რომელიც ამ წყლის არსებობით დაინტერესდა.

წყლის სამკურნალო თვისებებში დარწმუნებულია ამირან მახაჭაძე, სოფელ ბუთურაულის რწმუნებული. მან პირველმა აღმოაჩინა წყალი საკუთარ სოფელში.

„სინჯები რამდენჯერმე აიღეს და დადგინდა, რომ შაქრის საწინააღმდეგო კალორიებს შეიცავს ეს წყალი და მიწაც, სადაც ეს წყალი მოდის. დასკვნები მე რა უნდა გაჩვენოთ, მაჩვენეს და ასე ეწერა… გუშინწინ კიდევ აიღეს სინჯები. ახლა უკვე კონკრეტულად უნდა დადგინდეს, რა ნივთიერებებს შეიცავს ეს წყალი“, – გვითხრა ამირან მახაჭაძემ.

„ორი დღის წინ ავიღეთ ბუთურაულის წყლის სინჯები და გადავაგზავნეთ საქართველოს სოფლის მეურნეობის სამინისტროს ლაბორატორიაში. დასკვნებს დაახლოებით 20-25 დღე დასჭირდება,“ – უთხრა „ბათუმელებს“ ბათუმის სამეცნიერო-კვლევითი ინსტიტუტის დირექტორმა, პროფესორმა რამაზ სურმანიძემ.

რამაზ სურმანიძე აპირებს, რომ მონაცემების დამუშავება დაიწყოს და თუკი ლაბორატორიული კვლევა წყლის სამკურნალო თვისებას დაადასტურებს, ბუთურაულის წყლისთვის შესაბამისი სტატუსის მისანიჭებლად იმუშაოს.

„ბუნებრივია, მხოლოდ ლაბორატორიის დასკვნა არ ნიშნავს, რომ წყალი სამკურნალოა. ამას დასჭირდება დაკვირვება და ცდების ჩატარება. შესაძლებელია ცდების ჩატარება, მაგალითად, მოხალისე ადამიანებზე. ასეთი ამ დროისთვის ძალიან ბევრია. ჩვენს ინსტიტუტს აქვს ამის რესურსი, რომ მონაცემები მოაგროვოს და დასკვნა დადოს. ალბათ, სხვა სამეცნიერო ინსტიტუტებიც დაინტერესდებიან,“ – ამბობს პროფესორი რამაზ სურმანიძე.

სოფლის მეურნეობის სამინისტროში „ბათუმელებს“ უთხრეს, რომ ვერ გვეტყვიან, ტარდება თუ არა ლაბორატორიული კვლევა ბუთურაულის წყალზე. სამინისტროს პრესსამსახურის აზრით, „ეს პირადი ინფორმაციაა. თქვენ რომ წარმოადგინოთ წყალი, დასკვნის შედეგები სხვამ ხომ არ უნდა გაიგოს?“

შუახევის მუნიციპალიტეტის გამგეობაში დაკავშირება მხოლოდ ჯანმრთელობის დაცვის სამსახურის უფროსთან მოვახერხეთ. „გამგეობა საქმის კურსში არ არის. ჩვენ მხოლოდ ის ვიცით, რომ ლაბორატორიული კვლევა ჩატარდება,“ – გვითხრა ზაზა ზოიძემ.

ბუთურაულის წყლის შესახებ ინფორმაციას არ ფლობენ აჭარის და საქართველოს ჯანმრთელობის დაცვის სამინისტროებში, ასევე გარემოს და ბუნებრივი რესურსების დაცვის სამინისტროში. ამ უწყებებში განმარტავენ, რომ წყლის გამოკვლევის მოთხოვნით მათთვის არავის მიუმართავს.

რა პროცედურების გავლაა საჭირო იმისთვის, რომ წყლის სამკურნალო თვისებები დადასტურდეს?  – ზემოთ ჩამოთვლილ უწყებებში ეს ინფორმაცია ვერ მოგვაწოდეს. სოფლის მეურნეობის სამინისტროში გვითხრეს, რომ აკრედიტაციის ეროვნული ცენტრია კომპეტენტური ამ საკითხში. აკრედიტაციის ცენტრში კი, მხოლოდ ის გვითხრეს, რომ 14 ლაბორატორია არსებობს, რომლებსაც წყლის ლაბორატორიული კვლევის ჩატარების უფლება აქვს.

„როგორც მე ვიცი, თუკი ლაბორატორიული კვლევით დადასტურდება წყლის სამკურნალო თვისება, ამის შემდეგ იკრიბება სპეციალური კომისია და ის იღებს გადაწყვეტილებას,“ – ეს რამაზ სურმანიძემ გვითხრა, აჭარის სოფლის მეურნეობის სამინისტროს ლაბორატორიის ხელმძღვანელმა. ამ ლაბორატორიაში ძირითადად სასმელი წყლის ვარგისიანობა დგინდება. რამაზ სურმანიძის განმარტებით, ბუთურაულის წყლის სინჯები ამიტომაც გადააგზავნეს თბილისში.

 

ნეტგაზეთის მასალების სხვა გამოცემებში გადაბეჭდვის წესი
ავტორი