esa

შსს: ხულოში 200-ზე მეტი მეხანძრე მუშაობს ხანძრის ჩასაქრობად

ხულოში, შავნაბადას მთაზე ტყეში გაჩენილი ხანძრის შესახებ საქართველოს შინაგან საქმეთა სამინისტრო განცხადებას ავრცელებს. უწყების ინფორმაციით, ხანძრის ქრობის სამუშაოები ინტენსიურად მიმდინარეობს და ამ დროისთვის, ცეცხლის კერებთან უკვე შეყვანილია შსს-ს საგანგებო სიტუაციების მართვის სააგენტოს 200-ზე მეტი მეხანძრე-მაშველი და განსაკუთრებულ დავალებათა დეპარტამენტის 300 თანამშრომელი. შინაგან საქმეთა მინისტრის, გიორგი მღებრიშვილის ბრძანებით, ხანძრის ეფექტური ლოკალიზების მიზნით, ცეცხლის ქრობის პროცესში ჩაერთვება შსს-ს ვერტმფრენი.

ხანძარს ხულოში უკვე მესამე დღეა ებრძვიან. ხანძრის კერასთან ყველაზე ახლოს მდებარე დასახლებული პუნქტი სოფელი მეკეიძეებია.

ხანძრის სალიკვიდაციო სამუშაოებთან დაკავშირებით შტაბი შეიქმნა, რომელსაც აჭარის მთავრობის თავმჯდომარე ზურაბ პატარაძე ხელმძღვანელობს. შტაბის შემადგენლობაში არიან შსს-ს სამაშველო სამსახურის, აჭარის საგზაო დეპარტამენტის, აჭარის გარემოს დაცვის სამმართველოს და ხულოს მუნიციპალიტეტის ხელმძღვანელი პირები.

ფოტოზე: ხანძარი შავნაბადას მთაზე. ფოტო: აჭარის მთავრობა 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com