xuloebi

აჭარის მუნიციპალიტეტების გამგებლების შემოსავლები

2016 წელს, ქედის, ხულოს, შუახევისა და ხელვაჩაურის მუნიციპალიტეტების გამგებლებიდან, ყველაზე მეტი ანაზღაურება – 51 326 ლარი და 31 თეთრი ხელვაჩაურის გამგებელ ნადიმ ვარშანიძეს აქვს აღებული, გასულ წელს შევსებული ქონებრივი დეკლარაციის მიხედვით.  ნადიმ ვარშანიძეს, როგორც ბათუმის საზღვაო აკადემიის სრულ პროფესორს, შარშან, ხელფასის სახით, 26 000 ლარიც მიუღია.

ქონებრივი დეკლარაცია 2017 წლის ივლისის თვეში შეუვსია შუახევის გამგებელ ტარიელ ებრალიძეს. მას, როგორც გამგებელს – 45 200  ლარი აქვს მიღებული. გარდა გამგებლობისა, ტარიელ ებრალიძეს ხელფასის სახით 25 000 ლარი აუღია ხიჭაურის წმ. ტბელ აბუსერისძის სახელობის უნივერსიტეტიდან, როგორც ლექტორს.

გამგებლობის ხელფასთან ერთად სრული პროფესორის ხელფასს იღებს ხულოს გამგებელი – ბესიკ ბაუჩაძეც. გამგებელის თანამდებობაზე ბესიკ ბაუჩაძეს 37 500 ლარი აუღია, ხოლო როგორც ბსუ-ს ასოცირებულ პროფესორს – 10 400 ლარი.

ერთადერთი გამგებელი, ვინც საგანმანათლებლო საქმიანობას არ ეწევა, არის დავით დუმბაძე. ქედის გამგებელს შარშან ხელფასის სახით 41 075 ლარი აქვს აღებული.

რაც შეეხება ქობულეთის მუნიციპალიტეტის გამგებელ სულხან ევგენიძეს, მის მიერ 2017 წელს შევსებული ქონებრივი დეკლარაცია არ იძებნება. 2016 წელს შევსებული დეკლარაციით კი სულხან ევგენიძეს 64 793 ლარი აქვს აღებული.

დავით დუმბაძის საკუთრებაში, 2006 წლის შემდეგ, უძრავ-მოძრავი ქონების შეძენა არ ფიქსირდება. 2017 წლის 27 ივლისის ქონებრივი დეკლარაციით კი, დავით დუმბაძის საკუთრებაში [100% მესაკუთრე], ქალაქ ბათუმში სამი ბინა და ხელვაჩაურის მუნიციპალიტეტის სოფელ წინსვლაში მიწის ნაკვეთი ირიცხება, აქედან ორი ბინა ფიროსმანის ქუჩაზე 1998-2000 წლებში შეუძენია, ხოლო ჯავახიშვილის ქუჩაზე, 80 კვადრატული მეტრი ფართობის ბინა მემკვიდრეობით მიუღია. მისთვის ასევე უჩუქებიათ 1 702 მეტრ/კვადრატი მიწის ნაკვეთი ხელვაჩაურის მუნიციპალიტეტის სოფელ წინსვლაში [2006 წელი].

 

2017 წლის 19 ივლისის ქონებრივი დეკლარაციით, ხულოს მუნიციპალიტეტის გამგებლის, ბესიკ ბაუჩაძის საკუთრებაში სახლი, მიწის ნაკვეთი, არასაცხოვრებელი ფართი და ერთი მსუბუქი ავტომობილი ირიცხება. გამგებელს სახლი, მიწის ნაკვეთი და არასაცხოვრებელი ფართი, სერგო მესხის ქუჩაზე 2015 წელს მემკვიდრეობით მიუღია.

xuloebi

ტარიელ ებრალიძე, ბესიკ ბაუჩაძე, დავით დუმბაძე, ნადიმ ვარშანიძე,სულხან ევგენიძე

ტარიელ ებრალიძე, ბესიკ ბაუჩაძე, დავით დუმბაძე, ნადიმ ვარშანიძე და სულხან ევგენიძე აჭარაში პირველი არჩეული გამგებლები არიან.

ადგილობრივი თვითმმართველობის [გამგებლების] მორიგი არჩევნები 2017 წლის 21 ოქტომბერს ჩატარდება.

ნეტგაზეთის მასალების სხვა გამოცემებში გადაბეჭდვის წესი
ავტორი