tba goma

რა იგეგმება მწვანე ტბასთან და მთა ღომაზე

აჭარის ფინანსთა და ეკონომიკის სამინისტრომ მწვანე ტბისა და ღომას მთის მიმდებარე ტერიტორიების კეთილმოწყობისა და განვითარების პროექტების შედგენაზე კონკურსები გამოაცხადა.

მწვანე ტბის შემთხვევაში მაქსიმალური თანხა 67 700 ლარია, ხოლო  მთა ღომას განვითარების პროექტში სამინისტრო 84 700 ლარს გადაიხდის.

ორივე კონკურსი 2017 წლის 7 სექტემბერს დასრულდება, პროექტები კი სამინისტროს ამავე წლის 16 დეკემბრამდე უნდა ჩაბარდეს.

საკონკურსო წინადადების მიხედვით მწვანე ტბასთან, საპროექტო ტერიტორიაზე შესაძლებლობისამებრ უნდა დაიგეგმოს:

  • ტერიტორიის შემდგომი განვითარების ზონირება (ლანდშაფტურ-სარეკრეაციო ზონა, საკურორტო-სარეკრეაციო ზონა, სატრანსპორტო ზონა, გარემოს დამცავი ზონა და სხვა.)
  • წყარო და საპიკნიკე ადგილები.
  • საკემპინგე ადგილი.
  • შენობა, რომელშიც განთავსდება: ადმინისტრაცია; ვიზიტორთა მიღებისა და საინფორმაციო ადგილი; 112-ის მომსახურება (მინიმალურად საჭირო); მცირე მოცულობის სავაჭრო და საზოგადოებრივი კვების ობიექტი/ები; საწყობი და სხვა ფუნქციონირებისათვის საჭირო სათავსები.
  • ფანჩატურების სქემატური ნახაზები და მისი განთავსების სიტუაციური გეგმა.
  • WC სქემატური ნახაზები და მისი განთავსების სიტუაციური გეგმა.
  • ავტოპარკინგის განთავსების სიტუაციური გეგმა და ავტომანქანების პარკინგის რაოდენობა.
  • ტერიტორიის სრულფასოვანი ფუნქციონირებისათვის სხვა დამატებითი ინფრასტრუქტურის მოწყობა.
  • ტბაზე ნავმისადგომის სქემატური ნახაზები და მისი განთავსების სიტუაციური გეგმა.
  • საინჟინრო-კომუნალური ქსელების მოწყობის სქემები.
  • სპორტული მოედანი.
  • ამფითეატრი.
  • საინფორმაციო და ამკრძალავი ნიშნების განთავსების სიტუაციური გეგმა.
  • საინფორმაციო და საგზაო ნიშნების განთავსება ძირითად საავტომობილო გზებსა და ბილიკებზე.

მთა ღომას  შემთხვევაში უნდა შემუშავდეს განაშენიანების რეგულირების გეგმა, რომელიც დამატებით უნდა მოიცავდეს:

  • საცხოვრებელი ზონის დეტალურ პროექტებს:
    საცხოვრებელი ზონის დასახლების დეტალურ დაგეგმარებას;
    სამშენებლოდ მიწის ნაკვეთების გამიჯვნა/დაყოფას, მინიმალური ფართობის გაანგარიშებით;
    მისასვლელი გზების დაგეგმარებას;
    სამშენებლო მოედანი უნდა დაიყოს ხუთი ტიპის საინვესტიციო მიწის ნაკვეთებად, რომელზეც განთავსდეს არანაკლებ 5 ტიპის დასასვენებელი კოტეჯი საცხოვრებელი ფართობის მიხედვით.
  • საცხოვრებელი კოტეჯების საპროექტო დოკუმენტაცია დამუშავდეს დეტალურად, სამშენებლო დოკუმენტის პროექტის კონდიციამდე.
  • სასტუმროს მშენებლობის საინვესტიციო წინადადებას:
    დაიგეგმოს 20-ნომრიანი სასტუმროს მშენებლობა, შემდგომში გაფართოების შესაძლებლობით.
  • გაიმიჯნოს სასტუმროს მშენებლობისათვის მიწის ნაკვეთი.
  • დადგინდეს საპროექტო ობიექტის ქალაქმშენებლობითი პარამეტრები და შესრულდეს სასტუმროს საპროექტო წინადადება.
  • წარმოდგენილი იქნეს გამსხვილებული ტექნიკურ-ეკონომიკური გაანგარიშება.
  • სატრანსპორტო ინფრასტრუქტურის მოწყობა:
    დაიგეგმოს ღია ავტოსადგომი, მომსახურების ცენტრი და შესაძლებელია ავტოგასამართი სადგური;
    განახლდეს შვეულფრენის დასაჯდომი ტერიტორია;
  • დამსვნებელთა მომსახურება:
    დაიგეგმოს მცირე საზოგადოებრივი კვების, 112 მომსახურების, სასოფლო-სამეურნეო და სხვა საქონლის მცირე სავაჭრო ობიექტები და გასართობი ცენტრის მოწყობა;
  • საინჟინრო-კომუნალური ქსელებით უზრუნველყოფის პროექტი:
    ტერიტორია და მასზე განთავსებული ყველა შენობა-ნაგებობა უზრუნველყოფილი იქნეს საინჟინრო-კომუნალური ქსელებით.
    ტერიტორიაზე დაგეგმარდეს გამწმენდი ნაგებობა/ნაგებობები.

მწვანე ტბა

მწვანე ტბა

მწვანე ტბა – ტბა საქართველოში, ხულოს მუნიციპალიტეტში. მდებარეობს არსიანის ქედის ჩრდილოეთ ნაწილში, ზღვის დონიდან 2058 მ სიმაღლეზე. ზედაპირის ფართობი 0,05 კმ². უდიდესი სიღრმე 19,4 მ. საზრდოობს თოვლის, წვიმისა და მიწისქვეშა წყლებით. გაედინება მიწისქვეშა გზით. წყლის დონე გაზაფხულზე მაღალია, ზამთარში დაბალი. სუსტად მინერალიზებული, სუფთა, გამჭვირვალე და სასმელად ვარგისია. ტბაში თევზი არ არის.

ღომას მთა

ღომას მთა

მთა ღომა  – მთა ქედისა და შუახევის მუნიციპალიტეტების ადმინისტრაციულ საზღვრებში შედის და იგი ცენტრალური მაგისტრალიდან 18 კილომეტრში მდებარეობს. გარდა სამკურნალო-მინერალური წყლებისა, ღომა ზამთრის კურორტის მოწყობის შესაძლებლობასაც იძლევა. ღომას მთის დასახლებები ზღვის დონიდან 1800-2000 მეტრის სიმაღლეზე მდებარეობს. თოვლი ოქტომბრის დასაწყისიდან მარტის ბოლომდეა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com