gv

ქვეწარმავლები და მღრღნელები „ბლექ სი არენაზე“

ოზურგეთის სოფელ ნატანებში მდებარე საკონცერტო დარბაზ „ბლექ სი არენასა“ და მის მიმდებარე ტერიტორიაზე ქვეწარმავლები და მღრღნელები აღმოაჩინეს, რის გამოც შპს „ბლექ სი არენა ჯორჯია“ დეზინფექციას და შეწამვლით სამუშაოებს ჩაატარებს.

კომპანიაში აცხადებენ, რომ საფრთხის წინაშე დგება საკონცერტო დარბაზის მომსახურე პერსონალი და დარბაზის ინვენტარი, რომელიც შესაძლოა დააზიანონ მღრღნელებმა.

gv

ქვეწარმავალი საკონცერტო დარბაზის ტერიტორიაზე / ფოტო: „ბლექ სი არენა ჯორჯია“

„დაფიქსირდა რამდენიმე შემთხვევა, როცა საკონცერტო დარბაზის ტერიტორიაზე აღმოაჩინეს სხვადასხვა ქვეწარმავალი და მღრღნელი. გამომდინარე იქიდან, რომ მიმდინარე პერიოდი დატვირთულია კონცერტებისა და ღონისძიებების მხრივ და უამრავი მაყურებელი სტუმრობს საკონცერტო დარბაზს, სიფრთხილის გამოჩენის მიზნით და საშიშროების თავიდან ასაცილებლად, მიზანშეწონილია მოხდეს მიმდებარე ტერიტორიების შეწამვლა სპეციალური საშუალებებით,“ – განაცხადეს „ბლექ სი არენა ჯორჯიაში“.

კომპანიაში ამბობენ, რომ აღნიშნული ფაქტი გამოვლინდა 2017 წლის 5 აგვისტოს, „ქართული ხმების“ ღონისძიების წინა დღეებში და ასეთი ფაქტი აქამდე არ დაფიქსირებულა.

„ბლექ სი არენა ჯორჯია“ შეწამვლის სამუშაოების შესყიდვას ტენდერის გარეშე აპირებს და ამას გადაუდებელი აუცილებლობით ხსნის: „მიმდინარე პერიოდში შეწამვლის სამუშაოები უნდა განხორციელდეს ერთჯერადად, საკონცერტო დარბაზსა და მის მიმდებარედ, სულ 8 ჰექტარ ფართობზე. მიმდინარე სეზონის განმავლობაში შეწამვლის სამუშაოები აღარ იქნება საჭირო“.

დარბაზისა და ტერიტორიის შეწამვლას 3 დღე დასჭირდება.

წერილი გადაუდებელი შესყიდვის შესახებ

წერილი გადაუდებელი შესყიდვის შესახებ

საკონცერტო დარბაზი „ბლექ სი არენა“

საკონცერტო დარბაზი „ბლექ სი არენა“

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com