ფიჭვნარი მაშველების გარეშე – პლაჟი, სადაც აკრძალვის მიუხედავად ბანაობენ

ქობულეთის შემოსასვლელიდან [ჩოლოქის ხიდიდან] დაახლოებით 2 კილომეტრის მანძილზე პრესტიჟულ პლაჟად მიიჩნევა. აქ ზღვაში საბანაოდ თუ ფიჭვნარში დასასვენებლად/საპიკნიკოდ, ძირითადად, მანქანებით და კარვებით მოდიან – როგორც ქართველები, ასევე უცხოელი ტურისტები.

აქ ზღვის სეზონზე ყოველთვის ხალხმრავლობაა, თუმცა ტერიტორიაე არც შესაბამისი ინფრასტრუქტურა არის და არც სამაშველო პუნქტები. ამის გამო ამ ტერიტორიაზე ბანაობა აკრძალულია.

ქობულეთის მუნიციპალიტეტის გამგეობაში „ბათუმელებს“ უთხრეს, რომ სამაშველო პუნქტების გახსნა მათ კომპეტენციაში არ შედის, ინფრასტრუქტურა კი მოწესრიგდება მრავალწლიანი პროგრამის ფარგლებში, რომელიც ქობულეთის მთელ სანაპირო ზოლს ეხება და მიმდინარე წლის სექტემბრიდან დაიწყება. კონკრეტულად რას ითვალისწინებს ეს პროგრამა ფიჭვნარის შემთხვევაში, გამგეობაში ვერ დაგვიკონკრეტეს.

„შსს-ს საგანგებო სიტუაციების მართვის სააგენტო შეიქმნა 2015 წელს და ამ პერიოდიდან მოყოლებული, საკურორტო ზონებში, მუნიციპალიტეტებთან ერთად, პლაჟის ზოლზე არსებული ვითარების გაუმჯობესების მიზნით მუშაობა აქტიურ რეჟიმში მიმდინარეობს. კერძოდ, ეტაპობრივად ხდება გამაფრთხილებელი აბრების დამატება შავი ზღვის სანაპიროზე, მიმდინარეობს არსებული ინფრასტრუქტურის გაუმჯობესება და ა.შ.

რაც შეეხება ახალ ლოკაციაზე მაშველების განთავსების საკითხს – იქ, სადაც მოეწყობა პლაჟის ზოლი, ანუ – შემოწმდება წყლის სინჯები, შემდეგ, ზღვაში შემოიფარგლება უსაფრთხო გაგრილებისთვის რეკომენდირებული ტერიტორია და ამის შესახებ მუნიციპალიტეტი აცნობებს საგანგებო სიტუაციების მართვის სააგენტოს, ჩვენ დაუყოვნებლივ ვახდენთ რეაგირებას და დამსვენებელთა რაოდენობის ადეკვატურად, უზრუნველვყოფთ სათანადოდ აღჭურვილი წყალზე მაშველების განთავსებას მათ მიერ მითითებულ ტერიტორიაზე“, – მოგვწერეს საგანგებო სიტუაციების მართვის სააგენტოდან.

სააგენტოს ინფორმაციით, ფიჭვნარში სამაშველო პუნქტების გახსნის თხოვნით მუნიციპალიტეტს მათთვის არ მიუმართავს. სააგენტოში ასევე განაცხადეს, რომ „იქ, სადაც მოწყობილია პლაჟის ზოლი და მოსალოდნელია დამსვენებელთა დიდი ოდენობით კონცენტრირება, საგანგებო სიტუაციების მართვის სააგენტო იღებს შესაბამის ზომებს და უზრუნველყოფს მოქალაქეთა უსაფრთხო დასვენებას“. ასეთი პლაჟის ზოლები ქობულეთში ფიჭვნარის შემდეგ იწყება.

„ქობულეთში განთავსებულია საგანგებო სიტუაციების მართვის სააგენტოს 20 საგუშაგო. ამ მონაკვეთში, ცურვისთვის ნებადართულ ტერიტორიებზე, დამსვენებლების უსაფრთხოებას უზრუნველყოფენ შსს-ს წყალზე მაშველები. მათი რაოდენობა არის აბსოლუტურად საკმარისი იმისთვის, რომ კონკრეტული შემთხვევების დროს მოხდეს ადეკვატური რეაგირება და უმოკლეს დროში მიიღოს მაშველების ეფექტური დახმარება განსაცდელში მყოფმა პირმა“, – გვითხრეს სააგენტოში.

„რაც შეეხება ფიჭვნარისა და ჩოლოქის ტერიტორიის მიმდებარედ არსებულ შავი ზღვის  სანაპირო ზოლს, ამ მონაკვეთზე არ არის ნებადართული ცურვა, რადგან არის მდინარისა და ზღვის შესართავი ლოკაცია, შეინიშნება ძლიერი წყალქვეშა დინებები და სხვა გარემო-ფაქტორები, რაც წყალში შესული მოქალაქის უსაფრთხოებას ეჭვქვეშ აყენებს. რამდენადაც ჩვენთვის ცნობილია, ამ ტერიტორიაზე ადგილობრივი მუნიციპალიტეტის მიერ დამონტაჟებულია ამკრძალავი ნიშნები და ბანერები, რომლის გათვალისწინებაც სავალდებულოა ყველა ადამიანისთვის“, – აცხადებენ საგანგებო სიტუაციების მართვის სააგენტოში.

„ფიჭვნარის პლაჟი“ მდინარის შესართავს საკმაო მანძილითაა დაშორებული, თუმცა აქ და არც ზღვაში, მიუხედავად ხალხმრავლობისა, არ არის შემოსაზღვრული [ტივტივებით] ტერიტორია, სადაც ნებადართული იქნებოდა ბანაობა.

ფიჭვნარი / ქობულეთი / 5.08.2017 / თედო ჯორბენაძის ფოტოები

ფიჭვნარი / ქობულეთი / 5.08.2017 / თედო ჯორბენაძის ფოტოები

IMG_20170805_105122IMG_20170805_104617IMG_20170805_104639IMG_20170805_105253

ქობულეთის მუნიციპალიტეტის გამგეობაში ისიც გვითხრეს, რომ ფიჭვნარის სანაპირო ზოლი ეკონომიკური ზონაა. ის მუნიციპალიტეტის საკუთრებაში არ არის, შესაბამისად, არც აქვთ უფლება სხვის საკუთრებაში რაიმე ინფრასტრუქტურა განავითარონ.

ვინ ფლობს ქობულეთის შემოსასვლელში [ფიჭვნარში] – ავტომაგისტრალსა და პლაჟს შორის არსებულ ზოლში მიწის ნაკვეთებს? – საჯარო რეესტრის ეროვნული სააგენტოს უახლესი მონაცემებით, აღნიშნულ ზოლში მიწის ნაკვეთების მესაკუთრეები არიან:

  • 104 294 კვ/მ – მესაკუთრე „აკვაცენტრი“ [2004 წლიდან];
  • 4 680 კვ/მ – „აკვაცენტრის“ საკუთრების გვერდით მდებარე, ზღვაზე გასასვლელი ვიწრო ზოლის მესაკუთრეა ქობულეთის მუნიციპალიტეტი;
  • 70 073 კვ/მ – შპს „კმგ – სერვის საქართველოს“ საკუთრებაშია 2006 წლიდან; ამ კომპანიის 100% წილის მფლობელია ყაზახური „კაზმუნაიგაზ სერვისი“.
  • 24 911 კვ/მ – მესაკუთრე ლეონიდ ჩერნოვეცკი, კიევის ყოფილი მერი. ამ ნაკვეთის მესაკუთრედ გასულ წელს ფიქსირდებოდა შპს „ლუგამინო ჰოლდინგ ლიმითედ“;
  • 2 235 კვ/მ – ლეონიდ ჩერნოვეცკის ნაკვეთის მომიჯნავედ არსებული ეს ვიწრო ზოლი ქობულეთის მუნიციპალიტეტის საკუთრებაშია;
  • 70 000 კვ/მ – ამ ფართობის მიწა ფიჭვნარში აჭარის ავტონომიური რესპუბლიკის საკუთრებაა;
  • 19 455 კვ/მ – ამ ფართობს 2013 წლის დეკემბრიდან ფლობს კომპანია „MANSURYA INTERNATIONAL“ [ნაკვეთები აჭარის საკუთრების გვერდითაა], ამ კომპანიის მესაკუთრე და დირექტორი კი საუდის არაბეთის სამეფოს მოქალაქეა;
  • 24 448 კვ/მ – ეს ფართობიც აჭარის საკუთრებაშია;
  • 20 028 კვ/მ – ამ ფართობის მიწის მესაკუთრე კი, 2009 წლიდან არის კომპანია „არგო ანურია“. ამ კომპანიის მფლობელია შპს „ანურია“, რომლის 100% წილის მფლობელია რუსეთის მოქალაქე კლიმენტი ქასრაძე.                                                                                                                   ამ ფართობის შემდეგ, ქალაქ ქობულეთის ცენტრის მიმართულებით, იწყება ადგილობრივი მოსახლეობის ნაკვეთები.

რაც შეეხება პლაჟს, მთელი სანაპირო მდინარე ჩოლოქის შესართავიდან [მათ შორის ლეონიდ ჩერნოვეცკის საკუთრების გასწვრივ არსებული პლაჟი] ქობულეთის მუნიციპალიტეტის საკუთრებაშია.

ფიჭვნარი

ფიჭვნარი

აქედან „იწყება“ ქობულეთი

აქედან „იწყება“ ქობულეთი

ქობულეთის შემოსასვლელი / ჩოლოქის ხიდთან“ / 5.08.2017

ქობულეთის შემოსასვლელი / ჩოლოქის ხიდთან“ / 5.08.2017

fiW ---

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com