20 ათასი ლარი ნურიგელის ტბის გათევზიანებისთვის

ბათუმში, ნურიგელის ტბის გათევზიანებისთვის, ბათუმის ბიუჯეტიდან 20 ათასი ლარი გამოიყო. ამ თანხით იგეგმება ასევე აერაციის სისტემის გადახურების საწინააღმდეგო და საკონტროლო აღჭურვილობის სისტემის შეძენაც. საკითხი დღეს, 31 ივლისს, ბათუმის საკრებულოში განიხილეს. მუნიციპალიტეტის საკრებულოს სხდომა ამ წუთებშიც მიმდინარეობს. დღის წესრიგში რამდენიმე საკითხია შეტანილი.

6 მაისის პარკში, ნურიგელის ტბაში, ბევრი მოქალაქე თევზაობს, თუმცა თევზჭერა აქ არ არის რეკომენდებული. სპეციალისტების რეკომენდაციით, ამ ტბაში დაჭერილი თევზი მხოლოდ კარგი თერმოდამუშავების შემთხვევაში არ არის საშიში ჯანმრთელობისთვის.

ტბაზე ნავით სეირნობა და თევზჭერა მას შემდეგ აიკრძალა, რაც ტბამ დაჭაობება დაიწყო .

ტბაში აერაციის სისტემა 2016 წელს დაამონტაჟეს.  მას შემდეგ, რაც ეს სისტემა დამონტაჟდა, ტბაში ჟანგბადის შემცველობა დარეგულირდა. ეს ადგილობრივი მეცნიერების ბოლო კვლევის შედეგებით დასტურდება, რომელთა მიხედვითაც ჟანგბადის მაჩვენებელი მასში დაახლოებით 5-ჯერ გაიზარდა.

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com