ბათუმი-ახალციხის ავტომაგისტრალზე ვიდეოკამერებს დაამატებენ

ბათუმი-ახალციხის ცენტრალური საავტომობილო გზის ქედის მონაკვეთზე, სოფელ დოლოგნიდან ცხმორისამდე, დამატებით შვიდ ვიდეოკამერას დაამონტაჟებენ. კამერები ერთიან ბაზაში ჩაერთვება. ვიდეოკამერების დამონტაჟებასა და ახალი და არსებული კამერების ერთ ბაზაში მოსაქცევად, ქედის გამგეობამ ბიუჯეტიდან 28 ათასი ლარი გამოყო.

„ვიდეოკამერები დაყენებული გვაქვს ცენტრალურ საავტომობილო მაგისტრალის ქედის მონაკვეთზე, ქედაში შემოსასვლელთან, სოფელ ევგენიძეებიდან ცხმორისის ჩათვლით მონაკვეთში; ვიდეოკამერებია დაყენებული დაბებშიც. გამოყოფილი თანხით არსებული ვიდეოკამერების ოპტიკურ-ბოჭკოვანი კაბელით უზრუნველყოფა, ახალი კამერების მონტაჟი და მათი ერთიან  სისტემაში მოქცევა იგეგმება,“ – ამბობს ქედის გამგებელი დავით დუმბაძე.

გამგებლის ინფორმაციით, ვიდეოკამერები ქედაში, იმ ტერიტორიებზე განთავსდება, სადაც ტურისტები ხშირად არიან. კამერების განსათავსებელი ზუსტი ლოკაციები კი შსს-მ შეარჩია.

ნეტგაზეთის მასალების სხვა გამოცემებში გადაბეჭდვის წესი
ავტორი