sakrebulo qeda

ქედის ბიუჯეტი 1,9 მილიონი ლარით გაიზარდა

ქედის მუნიციპალიტეტის ბიუჯეტი 1 მილიონ 959 ათას 70 ლარით გაიზარდა. მუნიციპალურ ბიუჯეტში კორექტირების შეტანის საკითხი ქედის საკრებულომ დღეს, 30 ივნისს, განიხილა.

ქედის გამგეობის საფინანსო სამსახურის უფროსის, ჯემალ ტაკიძის ინფორმაციით, 1 639 000 ლარი  ქედის გამგეობამ აჭარის მთავრობის რესპუბლიკური ბიუჯეტიდან მიიღო, ხოლო დანარჩენი – 320 070 ლარით ადგილობრივი ბიუჯეტი ელექტრონული ტენდერებიდან მიღებული ეკონომიებითა და ჭარბი შემოსავლით შეივსო.

კორექტირების შედეგად ბიუჯეტში შესული თანხიდან ქედის გამგეობა 693 940 ლარით მეწყერსაწინააღმდეგო ღონისძიებების გატარებას გეგმავს; 545 060 ლარით – დაბაში, აღმაშენებლის ქუჩაზე, ყოფილი სამკერვალო ფაბრიკის შენობის რეკონსტრუქციის ჩატარებას და საცხოვრებელ სახლად გადაკეთდებას; 20 000 ლარით კი გამგეობა მოქალაქეებისთვის 1 800 მეტრი სასმელი წყლის მილს შეიძენს; ასევე დაფინანსდება ზუნდაგის სავაბშვო ბაღის რეაბილიტაცია და სტიქიის შედეგების სალიკვიდაციო ღონისძიებები.

ბიუჯეტის კორექტირებას მხარი საკრებულოს ოპოზიციამ არ დაუჭირა.

ქედის საკრებულოს წევრი „ერთიანი ნაციონალური მოძრაობიდან “ ვაჟა ბოლქვაძე აცხადებს, რომ ქედის გამგეობა თანხას არამიზნობრივად ხარჯავს. ამის მაგალითად საკრებულოს წევრს გასულ წელს სოფლების – ხუნკუდა-გულები-ზესოფლის სასმელი წყლის მაგისტრალის მშენებლობა მოჰყავს, რომელიც 2016 წელს აშენდა და მისივე ინფორმაციით, აღნიშნული მაგისტრალიდან სასმელი წყლით ამ დრომდე არავის უსარგებლია.

„ბიუჯეტი არჩევნებზეა ორიენტირებული, წყლის მაგისტრალით, რომლის მშენებლობა რეალურად დასრულებულია, დღემდე არავინ სარგებლობს, სოფელში წინასაარჩევნოდ მისვლის მორალური უფლება არ აქვთ. ახლა ამ სამი სოფლის მოსახლეობისთვის მილებს ყიდულობენ, რომ წინასაარჩევნოდ დაურიგონ,“ – ამბობს ვაჟა ბოლქვაძე.

ქედის საკრებულოს სხდომა / 30.06. 2017 / ეკა ბარამიძის ფოტოები

ქედის საკრებულოს სხდომა / 30.06. 2017 / ეკა ბარამიძის ფოტოები

19619971_1407719899323712_785504963_o

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com