ხულოში ეკომიგრანტებისთვის მოწყობილი ბინები 5 წელია ცარიელია

ხულოს მუნიციპალიტეტის სხალთის თემის ცენტრში, სოფელ ყინჩაურში, ეკომიგრანტებისთვის მოწყობილი ბინები ამ დრომდე უფუნქციოდაა.

ადგილობრივმა ხელისუფლებამ დამეწყრილი ოჯახებისთვის საცხოვრებელი ბინების მოსაწყობად ყოფილი საავადმყოფოს შენობას რეაბილიტაცია 2012 წელს ჩაუტარა, ოთხსართულიანი შენობის პირველ სართულზე საბავშვო ბაღის, მეორე და მესამე სართულზე შვიდი ბინის მოსაწყობად, ადგილობრივი ბიუჯეტიდან მთლიანობაში 72 000 ლარი დახარჯა.

„ბათუმელების“ კითხვაზე – იმ სოციალურ და ეკოლოგიურ ფონზე, რაც ხულოს მუნიციპალიტეტშია, რატომ  დარჩა  2012 წელს მოწყობილი ბინები დღემდე უფუნქციოდ? – მუნიციპალიტეტის გამგებელი ბესიკ ბაუჩაძე პასუხობს:

„ეს ბინები არ აკმაყოფილებს საცხოვრებელ პირობებს. მოსახლეობამ შეშა რომ შეინახოს, ელემენტარული სათავსოებიც კი არ აქვს, სასტუმროს ტიპისაა… თავის დროზე მოსახლეობა შესახლების წინააღმდეგიც კი წავიდა, მხოლოდ ფორსმაჟორულ სიტუაციაში, ეკომიგრანტების პრობლემის მყისიერად, დროებით გადაჭრის მიზნით შეიძლება გამოვიყენოთ ეს ბინები, მაგალითად, თუ სადმე მეწყერი განვითარდება და ოჯახს საფრთხე დაემუქრება“.

გამგებლის ინფორმაციით, ადგილობრივ ხელისუფლებას აღნიშნული ბინები დღემდე არც დროებით, ფორსმაჟორულ სიტუაციაში გამოუყენებია, შენობა კი კვლავ სარეაბილიტაციოა.

„2013 წელს მოსახლეობამ აღნიშნულ შენობაში ფართობები თვითნებურად დაიკავა. თვითნებურად შესახლებულებს დააცლევინეს ბინები, თუმცა, შესახლებისას კარები და ფანჯრები ჩაამტვრიეს. იმ დროს მე არ ვიყავი გამგებელი და ვერ გეტყვით, რა კატეგორიის ადამიანებმა დაიკავეს ფართობები. ამ დროისთვის ბინების კარ-ფანჯარა ჩაკეტილია, მაგრამ შიგა დაზიანებები არ გაგვირემონტებია, ვმუშაობთ, რომ მოხდეს შენობის რეაბილიტირება.“ – ამბობს გამგებელი.

ადგილობრივი ხელისუფლება ერთხელ უკვე რეაბილიტირებული შენობის გარემონტებას თუ გადაწყვეტს, ბუნებრივია, შესაბამისი თანხის გამოყოფა დასჭირდება, რომელიც, ფაქტობრივად უფუნქციო შენობისთვის, მეორედ დაიხარჯება.

ყინჩაური / ყოფილი საავადმყოფოს შენობა / ეკა ბარამიძის ფოტოები „ბათუმელების“ არქივიდან

ყინჩაური / ყოფილი საავადმყოფოს შენობა / ეკა ბარამიძის ფოტოები „ბათუმელების“ არქივიდან

მთავარი ფოტო: სოფელი ყინჩაური – სკოლის შენობა [უკან: ყოფილი საავადმყოფოს შენობა /მარცხნივ/ და სხალთის ეკლესია /მარჯვნივ/]
ნეტგაზეთის მასალების სხვა გამოცემებში გადაბეჭდვის წესი
ავტორი