მელიტონ ბალანჩივაძის ხელოვნების სკოლის ანსამბლი „მეგობრობა“ საბერძნეთის ქალაქ ზევგოლათიოს 23-ე საერთაშორისო ფოლკლორის ფესტივალში მიიღებს მონაწილეობას.
„მეგობრობა“ ფესტივალზე ქართულ ხალხურ ცეკვებს წარადგენს, ასევე, ფესტივალის მსვლელობისას ანსამბლი მსოფლიო ხალხთა ცეკვებითაც გამოვა.
ფესტივალი 7 ივლისს დაიწყება და 11 ივლისამდე გაგრძელდება. მასში მონაწილეობას საქართველოს გარდა ბულგარეთის, უკრაინის, სომხეთისა და სხვა ქვეყნების წარმომადგენლები მიიღებენ.
„მეგობრობა“ სხვადასხვა საერთაშორისო ფესტივალის აქტიური მონაწილე გასულ წლებშიც იყო, მათ შორის 2013 წელს ანსამბლი ბულგარეთში გამართულ ხალხური ხელოვნების ფესტივალზე „საუკეთესოთა შორის საუკეთესოს“, ხოლო 2014 წელს რუმინეთში გამართულ ფესტივალზე განსაკუთრებული პრიზის ნომინაციების მფლობელი გახდა.
„მეგობრობას“ სულ 32 წევრი ჰყავს. ანსამბლის წევრების ასაკი შვიდიდან თექვსმეტ წლამდეა.
„ყველა მათგანი მელიტონ ბალანჩივაძის ხელოვნების სკოლის მოსწავლეა. ბავშვები ცეკვის გარდა ხელოვნების სხვა დარგებსაც შეისწავლიან, ზოგი გიტარაზე დაკვრას სწავლობს, ზოგიც – ვიოლინოზე… მრავალმხვრივ განვითარებულები არიან. ვცდილობთ, აქტიურად მივიღოთ მონაწილეობა კონკურსებსა თუ ფესტივალებზე. ბოლოს რაბათში გამართულ ფესტივალზე მივიღეთ მონაწილეობა, სადაც ბავშვებს დიპლომები და არაჩვეულებრივი წიგნები გადაეცათ საჩუქრად. მანამდე, 26 მაისს, საქართველოს დამოუკიდებლობისადმი მიძღვნილ ფესტივალშიც მივიღეთ მონაწილეობა, გავიცანით სხვადასხვა ქვეყნის წარმომადგენელთა კოლექტივები, ზოგი მოვიწვიეთ, ზოგმაც მიგვიწვია. მომავალ წელს ამერიკიდან, ინდონეზიიდან და პოლონეთიდან ველით სტუმრებს… რაც შეეხება ზევგოლათიოს საერთაშორისო ფოლკლორის ფესტივალს, ვიმედოვნებთ, ჩვენი გამოსვლა წარმატებული იქნება და საქართველოში ახალი მედლებით დავბრუნდებით,“ – ამბობს ანსამბლ „მეგობრობას“ ხელმძღვანელი მანანა სახელაშვილი.
15 წლის მარიამ კახიძე შვიდი წელია ანსამბლში ცეკვავს: „ცხრა წლიდან მელიტონ ბალანჩივაძის სახელობის მუსიკალურ სკოლაში შევედი, სადაც ერთდროულად მუსიკასა და ცეკვას ვსწავლობდი და იმის მერე დავდივარ. ყველაზე მეტად მასწავლებელი მიყვარს, ცეკვა მან შემაყვარა. ხშირად გვაქვს კონცერტები, მათ შორის საქველმოქმედოც. ქართული ცეკვებიდან მთიულური მიყვარს განსაკუთრებით, უცხოური ცეკვებიდან კი ამერიკულსა და უკრაინულს გამოვყოფდი.
მარიამ კახიძე
ცეკვა ძალიან დიდ ადგილს იკავებს ჩემს ცხოვრებაში, ფრენბურთზეც დავდივარ, თუმცა ცეკვა უფრო მნიშვნელოვანია. კონცერტების წინ ვარჯიშს განსაკუთრებით დიდ დროს ვანდომებ, ეს შეიძლება ხუთი, ექვსი საათიც კი იყოს.
საბერძნეთში ფესტივალს განსაკუთრებით ველი, ეს გამგზავრება, მგონია, გამორჩეული იქნება, თან ზაფხულია, ზღვაა, ახალი ბავშვებიც გვყავს და უფრო ახლოს გავიცნობთ ერთმანეთს.“
ლუკა ბერიძე ანსამბლის ყველაზე პატარა წევრია, ის ექვსი წლისაა. ცეკვაზე სიარული იანვრიდან დაიწყო. ლუკას საყვარელი ცეკვა აჭარული და ოსურია.
ლუკა ბერიძე
14 წლის მილედი ჯინჭარაძისთვის ეს პირველი გასტროლი იქნება: „ცეკვაზე დაახლოებით ორი თვეა დავიწყე სიარული. ამ დროისთვის უკვე ამერიკული და მთიულური ცეკვები ვისწავლე. განსაკუთრებით ქართული ხალხური ცეკვა მიყვარს – ემოციებითაა სავსე და ლამაზი ილეთები აქვს. მომწონს სოლოგამოსვლები. ფესტივალზე პირველად მივდივარ, ეს ასევე ჩემი პირველი მგზავრობა იქნება საზღვარგარეთ და ცოტას ვღელავ.“
მილედი ჯინჭარაძე
მელიტონ ბალანჩივაძის ხელოვნების სკოლა ხელოვანთა მობილობის ხელშეწყობის კონკურსის გამარჯვებულია. აღნიშნული ღონისძიება პროგრამის – „კულტურის სფეროს წარმომადგენელთა პროფესიული განვითარების ხელშეწყობის“ ფარგლებში განხორციელდება.
ფესტივალში მონაწილეთა ტრანსპორტირებას უზრუნველყოფს შპს „თრაველსი“. სწორედ ამ კომპანიამ გაიმარჯვა აჭარის განათლების სამინისტროს მიერ გამოცხადებულ ტენდერში. „თრაველსი“ ერთადერთი პრეტენდენტი იყო აღნიშნული შესყიდვის.
ანსამბლ „მეგობრობას“ რეპეტიცია
ანსამბლ „მეგობრობის“ რეპეტიცია
