mewyeri

ოჯახი მეწყრის ზონიდან: ჩვენს სახლს 40-ტონიანი ქვა ემუქრება

შუახევის მუნიციპალიტეტის სოფელ მახალაკიძეებში მცხოვრები ნათელა მახარაძე ამბობს, რომ მისი საცხოვრებელი სახლის გვერდით განვითარებული მეწყრული პროცესები სახლს საფრთხეს უქმნის. მოქალაქის თქმით, შუახევის მუნიციპალიტეტის მიერ შეთავაზებული პრობლემის მოგვარების მეთოდი არაეფექტურია.

„რვა თვის წინ სახლის გვერდით ფერდობზე წამოვიდა მეწყერი. ამ მეწყრულ უბანზე დევს 40-ტონიანი ქვა, რომელსაც ორივე მხრიდან მიწა შემოეცალა  და გაჩნდა საფრთხე, რომ ქვა დაიძრას. ჩემი სახლი შიდა სასოფლო გზის პირას დგას. მეზობელ სოფელში გადასასვლელად მანქანებს სახლის წინ უწევთ გავლა.  ნიადაგი არამყარია და სულ არის საფრთხე განმეორებითი მეწყრის. შარშან თითქოს გააკეთეს, გაამაგრეს ფერდობი, მაგრამ განმეორებითმა მეწყერმა ყველაფერი წყალში ჩაყარა. შუახევის მუნიციპალიტეტიდან მოვიდნენ  და მეუბნებიან, რომ 30  სანტიმეტრი სისქის კედელს ჩამოასხამენ. მიუღებელი და გაუმართლებელია ამ ტიპის კედლის ჩამოსხმა, ვერ დაიჭერს ამხელა მასას და სახლი დამენგრევა. ქვემოთ სკოლაა, ეს მიწა და ქვა რომ დაიძრას, სკოლასაც წაიღებს. მეტრონახევრიანი კედელი მაინც არის საჭირო, რომ ეს ადგილი გამაგრდეს,“ – ამბობს ნათელა მახარაძე.

ნათელა მახარაძის თქმით, მისი ოჯახის გარდა საფრთხე ემუქრებათ სხვა ოჯახებსაც, რომლებიც მეწყრულ ზონაში ცხოვრობენ.

შუახევის მუნიციპალიტეტის გამგეობას სოფელ მახალაკიძეებში საცხოვრებელ სახლთან  ფერდსამაგრი კედლის მოსაწყობად ტენდერი 8116 ლარზე აქვს გამოცხადებული. კონტრაქტორმა სამუშაო ხელშეკრულების გაფორმებიდან 2 (ორი) თვის ვადაში უნდა შეასრულოს. შუახევის გამგებელი, ტარიელ ებრალიძე ამბობს, რომ სოფელ მახალაკიძეების მცხოვრებთან შენიშვნების გათვალისწინებას არ აპირებს.

„გამოვაცხადეთ ტენდერი, შედგა პროექტი, გაკეთდა ხარჯთაღრიცხვა. თვითონ როგორც უნდათ, მთელ  მახალაკიძეებს მე ფერდსამაგრ კედელს ვერ შემოვავლებ, მაგრამ ვიმეორებ, რომ  ვაწარმოებთ სამუშაოებს.  ეს არის გეოლოგიური დასკვნის საფუძველზე გაკეთებული პროექტი. სადაც ლოკაცია არის საფრთხის შემცველი, იქ ვაკეთებთ. მათი მოთხოვნები ხანდახან არის საფუძვლიანი, მაგრამ ზოგჯერ მათი დამოკიდებულება, ეს ასე უნდა გაკეთდეს და ის ისე, პირდაპირ გეტყვით, მგონია უსაფუძვლო. თუკი ეს კედელი არ იქნება საკმარისი და შემდეგ მოხდება ის, რომ დავუშვათ, კვლავ დაიწყებს  მეწყერი გააქტიურებას, მომავალში, თუნდაც წლის მეორე ნახევარში, კორექტირებისას შესაძლოა გავითვალისწინებთ მოსახლეობის თხოვნას,“ – ამბობს ტარიელ ებრალიძე.

 

ნეტგაზეთის მასალების სხვა გამოცემებში გადაბეჭდვის წესი
ავტორი