აჭარის რესპუბლიკური ბიუჯეტი შემოსულობების ხარჯზე 28 მილიონი ლარით გაიზარდა. აქედან ყველაზე მეტი შვიდი მილიონ 600 000 ლარი აჭარის ფინანსთა და ეკონომიკის სამინისტროს შეხვდა.
აჭარის უმაღლესი საბჭოს საფინანსო-საბიუჯეტო კომისიის ხელმძღვანელის, გიორგი რომანაძის ინფორმაციით, ეს თანხა სამინიტრომ აჭარის მუნიციპალიტეტების გაზიფიცირების პროექტს უნდა მოახმაროს.
3 მილიონი ლარი დაემატება აჭარის გზებისა და სამელიორაციო სისტემების მართვის დეპარტამენტს.
1 156 000 ლარით იზრდება აჭარის ავტონომიური რესპუბლიკის განათლების, კულტურისა და სპორტის სამინისტროს ბიუჯეტი.
ჯანმრთელობისა და სოციალური დაცვის სამინისტროს კი 1 251 800 ლარი და ორი ახალი პროგრამა ემატება.
ჯანმრთელობის დაცვის პროგრამების დაფინანსება 974 200 ლარით იზრდება და ემატება ერთი ქვეპოგრამა – ნევროზული რეგისტრის დაავადებების მქონე პირთა სტაციონარული მკურნალობა.
სოციალური პროგრამები 241,6 ათასი ლარით იზრდება, მათ შორის ემატება ერთი ახალი პროგრამა – ფსიქიკური პრობლემების მქონე გერიატრიული პაციენტების თავშესაფრით უზრუნველყოფა, ხოლო დაავადებათა პრევენციისა და პროფილაქტიკის დაფინანსების პროგრამა 36 000 ლარით გაიზრდება.
ყველაზე ნაკლები ბიუჯეტის ნამატიდან სოფლის მეურნეობის სამინისტროს შეხვდა. სამინიტროს ბიუჯეტი 367 000 ათასი ლარით გაიზარდა.
70 000 ლარი გაითვალისწინეს აჭარის უმაღლესი საბჭოს ხარჯებისთვის. გიორგი რომანაძის ინფორმაციით, ეს თანხა უმაღლესი საბჭოს შენობის კონდიცირების სიტემის განახლება-გამართვას უნდა მოხმარდეს.
საერთო ჯამში აჭარის რესპუბლიკური ბიუჯეტი ამ დროისათვის 252 მილიონ 943 000 ლარს შეადგენს.
