„ამაზე მეტი რაღა უნდა მოხდეს“, „ძირს რეპრესია და ძალადობა“, „ცენზურა დაუშვებელია“, „ხმაურის დროა“ – ეს გზავნილები ჰქონდა საპროტესტო აქციას ბათუმში, ევროპის მოედანზე. შეკრებილებმა „ბირჟა მაფიას“ რეპერების: მიშკა მგალობლიშვილისა და გიორგი ქებურიას დაკავება გააპროტესტეს. რეპერები დაკავების მიზეზად იმ ვიდეოკლიპს ასახელებენ, რომელშიც პოლიციელი გააშარჟეს. დღეს, 10 ივნისს, საპროტესტო მსვლელობა მიმდინარეობს თბილისში, რუსთაველის გამზირზე.
საპროტესტო აქციის მონაწილეები ბათუმში რეპერების დაკავებას სხვა გახმაურებულ საქმეებს უკავშირებენ, სადაც ასევე პოლიციის მისამართით კითხვები გაჩნდა და ხელისუფლებას პასუხი არ გაუცია.
გიორგი ფირცხალაიშვილი, აქციის მონაწილე: „სახელმწიფო ვერ გვთავაზობს ვერანაირ ეკონომიკურ გადაწვეტას და გვებრძვის ტერორით. მასობრივი გაპროტესტება უნდა დაიწყოს ამ სისტემატური პოლიციური რეჟიმის. ესაა ერთი მთლიანი ჯაჭვი: დემურ სტურუას თვითმკვლელობაში ბრალდებული პოლიციელის გამართლება, მუხთარლის დაპატიმრება, ორი წლის წინ ლევან აბზიანიძის სიკვდილამდე მიყვანა. ეს უკვე არის პოლიციური პოლიტიკის სისტემა“.
ხათუნა სამნიძე, „რესპუბლიკური პარტიის“ ლიდერი: „არ გამკვირვებია ეს დაკავება. მუხთარლის დაკავება იყო პირდაპირი გზავნილი, რომ ხელისუფლება მიდის ძალადობის მიმართულებით. მას აქვს აბსოლუტური ძალაუფლება და დევნის ყველაფერს, რაც მისგან განსხვავებულია. განათლების მინისტრის კომენტარიც პირდაპირი გზავნილი იყო იქეთკენ, რომ ის დადგება ძალადობის მხარეს და არა უფლებების დაცვის მხარეს. ჩვენ ყოველდღიურად ძალიან დიდ ნაბიჯს ვდგამთ უკან ადამიანის უფლებების დაცვის კუთხით.“
კადრი რეპერების ვიდეოკლიპიდან
Youtube-ში ItsYoungMic-ის არხზე განთავსებული ვიდეო 4 ივნისსაა ატვირთული და მასში ერთ-ერთი პერსონაჟი დაბლარულია. როგორც „ნეტგაზეთს” ერთ-ერთი დაკავებულის ცოლმა უთხრა, ვიდეოს გადაღებაში რეპერებს ფინანსურად „აჭარანეთი“ დაეხმარა. ვიდეოს ინტერნეტში განთავსების შემდეგ მგალობლიშვილს „აჭარანეთიდან” დაურეკეს და უთხრეს, რომ შესაძლოა, ვინმეს კლიპის გამო პრობლემები შექმნოდა. ამის შემდეგ, მგალობლიშვილის ცოლის თქმით, რეპერმა ვიდეოწაშალა და ხელახლა ატვირთა, პოლიციელის ფორმაში გამოწყობილი პერსონაჟი კი – დაბლარა. ინტერნეტში იძებნება ვიდეოს ძველი ვერსია, სადაც ჩანს, რომ დაბლარული პერსონაჟი პოლიციელია.
ფოტოები: საპროტესტო აქცია ბათუმში რეპერების მხარდასაჭერად. მანანა ქველიაშვილის ფოტო.
