2018 წელს ბათუმი საჭადრაკო ოლიმპიადას უმასპინძლებს

 

44-ე მსოფლიო საჭადრაკო ოლიმპიადას 2018 წელს ბათუმი უმასპინძლებს. გადაწყვეტილება გუშინ ნორვეგიის ქალაქ ტრომსოში მიმდინარე ფიდე-ს გენერალურ ასამბლეაზე მიიღეს. ბათუმის კონკურენტი სამხრეთ აფრიკის ქალაქი კეიპტაუნი იყო. ღონისძიებას აჭარის მთავრობის თავმჯდომარე არჩილ ხაბაძე და საქართველოს სპორტის და ახალგაზრდობის მინისტრი ლევან ყიფიანი ესწრებოდნენ.

 

 

კენჭისყრამდე აჭარის მთავრობის თავმჯდომარემ კონგრესს აჭარის შესახებ პრეზენტაცია წარუდგინა.

 

„ყველა ბათუმელს, ყველა ქართველს ვულოცავ გამარჯვებას. მეამაყება, რომ ჩვენს ქალაქს ასეთი დიდი პატივი ხვდა წილად და 2018 წლის მსოფლიო საჭადრაკო ოლიმპიადას ბათუმი უმასპინძლებს. ჩვენ დავამტკიცეთ, რომ საქართველო მზადაა მსგავსი მასშტაბური ღონისძიების ჩასატარებლად და ხმათა უმრავლესობით გავიმარჯვეთ. ეს ჩვენი რეგიონისთვის უდიდესი გამოწვევაა, რომელიც არა მარტო ჭადრაკის, არამედ ქვეყნის და რეგიონის ისტორიაშიც ერთ-ერთ მნიშვნელოვან მოვლენად დარჩება“, – განაცხადა არჩილ ხაბაძემ.

 

2018 წლის ჭადრაკის ოლიმპიადის ბიუჯეტი 20 მილიონ ამერიკულ დოლარს შეადგენს. 1.6 მილიონი დოლარით სტუმრების მგზავრობა დაფინანსდება, ხოლო 800 000 დოლარი ფედერაციების განვითარების ხელშეწყობისთვის გამოიყოფა.

 

ბათუმი არაერთხელ ყოფილა ჭადრაკის ჩემპიონატებისა და ოლიმპიადების მასპინძელი. ბათუმში არის ჩატარებული ევროპის ჩემპიონატი, ევროპის პირველი ჩემპიონატი ქალთა შორის, პირველი ინტერკონტინენტალური მატჩი ევროპასა და აზიას შორის, ევროპის ინდივიდუალური ჩემპიონატი ჭადრაკში, ახალგაზრდული ჩემპიონატი, ქალთა მსოფლიო ჩემპიონატი.

 

ნეტგაზეთის მასალების სხვა გამოცემებში გადაბეჭდვის წესი


"ბათუმელები"