ბათუმში „პროფკავშირების“ შენობის რესტავრაცია-რეაბილიტაცია იგეგმება

აჭარის კულტურული მემკვიდრეობის დაცვის სააგენტო ბათუმში კიდევ ერთი უძრავი ძეგლის, ე.წ. პროფკავშირების საახლის რესტავრაცია-რეაბილიტაციას გეგმავს. ეს აგურის შენობა ბათუმში, კონსტანტინე გამსახურდიასა და მემედ აბაშიძის ქუჩების კვეთაში დგას. მასში სხვადასხვა ორგანიზაციების ოფისებია განთავსებული. სააგენტო სარესტავრაციო სამუშაოებს შენობის სახურავსა და ფასადზე ჩაატარებს.

უძრავი ძეგლის – ქ. ბათუმი, კ. გამსახურდიას N13/მ. აბაშიძის N23 მდებარე ძეგლი ე.წ. პროფკავშირების შენობის სახურავისა და ფასადის რესტავრაცია-რეაბილიტაციის მიზნით კვლევითი სამუშაოებისა და სარეაბილიტაციო სამუშაოების საპროექტო დოკუმენტაციის მომზადებაზე ტენდერი უკვე გამოცხადებულია. დოკუმენტაციისთვის სააგენტოს 11 ათასი ლარი აქვს გათვალისწინებული. ტენდერი 16 ივნისს დასრულდება. დოკუმენტაცია კი ხელშეკრულების გაფორმებიდან სამ თვეში უნდა მომზადდეს.

ანალოგიურ დოკუმენტაციას სააგენტო კ. გამსახურდიას ქუჩაზე მდებარე ყოფილი სომხურ-კათოლიკური ეკლესიის სარეაბილიტაციოდაც შეისყიდის. ეს შენობა 2012 წლიდან საქართველოს საპატრიარქოს ბალანსზეა, თუმცა წლების განმავლობაში მოუვლელია. წელს, თებერვალში ჩამოინგრა სახურავი, შენობა ავარიულია.

ბათუმში ძეგლის სტატუსის მქონე ექვსი კერძო სახლის რეაბილიტაციაც იგეგმება. ეს სახლებია: ბათუმში – დემეტრე თავდადებულის  N35, მაზნიაშვილის  N6 – აბაშიძის N15, ზუბალაშვილის N38, კომახიძის  N4, ჟორდანიას  N14,  ვ. გორგასლის  N24 . ასევე რეაბილიტაცია უნდა ჩაუტარდეს ქობულეთში მდებარე უძრავ ძეგლს – „ეფენდიევის ვილას“.

IMG_20170525_171923

„პროფკავშირების“ შენობა ბათუმში / 25.05.2017

IMG_20170525_172018

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com