28337

16 ქვეყანაში აჭარის რეკლამირებისათვის 4 მილიონზე მეტი ლარი დაიხარჯება

2017 წელს აჭარის ტურიზმისა და კურორტების დეპარტამენტი 16 სამიზნე ქვეყანაში რეგიონის რეკლამირებისათვის 4, 765, 000  ლარს დახარჯავს.
წელს დეპარტამენტი ექვს, ახალ, სამიზნე ქვეყანაში გეგმავს შესვლას. ეს ქვეყნებია: არაბეთის გაერთიანებული საემიროები, საუდის არაბეთი, ლატვია, ესტონეთი, გერმანია და ირანი. ამ ქვეყნების გარდა რეგიონის რეკლამირება მოხდება თურქეთში, სომხეთში, აზერბაიჯანში, უკრაინაში, ბელარუსიაში, ლიტვაში, პოლონეთში, ყაზახეთში, ისრაელსა და რუსეთში.
რეკლამირებისათვის გათვალისწინებულ თანხაში შედის მედია და ინფოტურებისათვის გათვალისწინებული ხარჯები, სტატიებისა და სარეკლამო კლიპების  გამოქვეყნება სამიზნე ქვეყნებში, საერთაშორისო გამოფენებში მონაწილეობა და სარეკლამო ბუკლეტების დაბეჭდვა.
წლის ბოლომდე აჭარის რეკლამირება 7 საერთაშორისო გამოფენაზე იგეგმება. მიმდინარე წელს რეგიონის 5 საიმიჯო კლიპი უნდა დამზადდეს, რომლებიც „ალჯაზირას“, „ევრონიუსისა“ და სხვა საერთაშორისო ტელევიზიების ეთერში იტრიალებს. ვიდეოკლიპები ასევე გავრცელდება სამიზნე ქვეყნების ონლაინსივრცეში.
ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com