სამშენებლო ღობეებით მიტაცებული ტროტუარი

ბათუმში, მეორე სკოლის გვერდით, მელიქიშვილისა და ფარნავაზ მეფის ქუჩების კვეთაში, მაღალსართულიანი სახლის მშენებლობა რამდენიმე წელია გაჩერებულია. შენობას შემოვლებული ჰქონდა ე.წ. დამცავი ღობე ალუმინის დაჭმუჭნილი ფურცლებით, რომლითაც ტროტუარი ქუჩის გამყოფ ბორდიურამდე იყო შემოღობილი. 19 აპრილს განვითარებული ძლიერი ქარის შემდეგ, უკვე ორი დღეა, ეს ფურცლები პირდაპირ ქუჩაში ყრია. შესაბამისად, ნაგვის გროვად ქცეული ღობის შიგა მონაკვეთი ახლა ქუჩის ყოველი მხრიდან ჩანს, ხოლო ქვეითებს პირდაპირ მანქანების სავალ ნაწილზე უწევთ სიარული.

18052161_1838529196472062_2035266752_o (1)

ადგილზე „ბათუმელებს“ უთხრეს, რომ მრავალბინიან საცხოვრებელ სახლს შპს „გლობალმშენი“ აშენებდა და ბინების უმეტესობაც წინასწარ ჰქონდა გაყიდული. მშენებლობის დასრულებამდე კომპანიის მეპატრონემ მშენებლობა შეაჩერა, თავად კი გაუჩნარდა: „დიდი ამბები იყო, ერთი ბინა რამდენჯერმე გაყიდა, შემდეგ გაუჩინარდა, დაზარალებულებმა სასამართლოში შეიტანეს სარჩელი, მაგრამ ვერავინ ვერაფერს გახდა, დღემდე არ აქვთ პასუხი.“

ბათუმში ტროტუარების ათვისების პარამეტრებს მერიის ზედამხედველობის სამსახური აკონტროლებს. მერიის პრესსამსახურის ინფორმაციით, მას შემდეგ, რაც მშენებელი კომპანია გაუჩინარდა მელიქიშვილისა და ფარნავაზ მეფის ქუჩების კვეთაზე მრავალბინიანი სახლის მშენებლობას ამხანაგობა „პანაცეა“ აგრძელებს და მშენებლობის დასრულების ვადად 2017 წელია განსაზღვრული. მშენებლობის დარულებამდე კი მერია სამშენებლო ღობის მოხსნას ვერ მოითხოვს, რადგან მერიასთან შეთანხმებული პარამეტრები კომპანიას არ დაურღვევია.

ვისი ვალდებულებაა ქალაქის ერთ-ერთ მთავარ ქუჩაზე ღობის დაყრილი ნარჩენების ოპერატიულად გატანა? – ეს კითხვა „ბათუმელებმა“ მერიის პრესსამსახურს დაუსვა, რაზედც გვიპასუხეს: „ზედამხედველობის სამსახურის ჯგუფი დღეს გავიდა ჩამოვლაზე და გააფრთხილებს ამხანაგობას, რომ მოაწესრიგოს ტერიტორია“.

 

ნეტგაზეთის მასალების სხვა გამოცემებში გადაბეჭდვის წესი
ავტორი