ქარი ბათუმში

ბათუმის მერია ქარის შედეგად მიყენებულ ზარალს ითვლის

გუშინ ღამით ბათუმში,  თამარის დასახლებაში, ძლიერმა ქარმა სახურავი ახადა საცხოვრებელ კორპუსს; რამდენიმე ადგილზე წაქცეულია სამშენებლო მოედნის დამცავი ღობე; ბათუმის სამაშველო სამსახურის ინფორმაციით, ძლიერი ქარის შედეგად ადამიანები არ დაშავებულან.

ქარმა ხეები წააქცია ფრიდონ ხალვაშის გამზირზე და ხელვაჩაურში. მათგან ერთი სახლს დაეცა, ერთმა კი ავტომობილი დააზიანა.

სახლი, რომელსაც თამარის დასახლებაში ქარის შედეგად  სახურავი დაუზიანდა, აფხეზეთიდან დევნილ ოჯახებზეა გადაცემული. კორპუსში შექმნილია ამხანაგობა, თუმცა „ბათუმელების“ ინფორმაციით, სახლის სახურავს ბათუმის მერიის ააიპ „ბათუმის კორპუსი“ შეაკეთებს.

მერიის ინფორმაციით, „დღეიდან განხორციელდება დაზიანებული სახურავების დროებით ბრეზენტით გადახურვა და დაპროექტების სამუშაოები. რამდენიმე დღეში კი დაიწყება სახურავების სრული რეაბილიტაცია“.

ამ წუთებში ბათუმის მერიაში გუშინ ღამით განვითარებული ქარის შედეგად მიყენებულ ზარალს ითვლიან.  ბათუმის მერიისგან მიღებულ დეტალურ ინფორმაციას მოგვიანებით მოგაწვდით.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან