220

დენის მიწოდებაში შეზღუდვები აჭარის მთიანეთში მაისამდე გაგრძელდება

„ენერგო პრო-ჯორჯიას“ აჭარისა და გურიის სადისპეტჩერო განყოფილების უფროსის, ჰაიდარ ფარტენაძის თქმით, მაღალი ძაბვის ელექტროგადამცემი ხაზის გაყვანასთან დაკავშირებით აჭარის მთიანეთში ელექტროენერგიის მიწოდებაში შეზღუდვები აპრილის თვის ბოლომდე გაგრძელდება. მისივე თქმით, დაანონსებულ სამუშაოებთან დაკავშირებით ინფორმაციას აბონენტები sms-ით მიიღებენ, ხოლო სოფლებში ეტაპობრივად, სამდღიანი გრაფიკით, დღისით შეწყდება შუქის მიწოდება.

„220-კილოვოლტიანი ელექტროგადამცემი ხაზის გაყვანასთან დაკავშირებით შუქი მოსახლეობას დღით, სამდღიანი გრაფიკით გაეთიშება. შუქის გამორთვას განაპირობებს ის, რომ იქ, სადაც ახალი ხაზი გადის, არის როგორც 10-კილოვატიანი, ასევე 04- კილოვატიანი ელეტროენერგიის გადამცემი ხაზი, რითაც მოსახლეობას შუქი მიეწოდება. ხელი რომ არ შეუშალოს ახალი ხაზის გაყვანას არსებულმა გაყვანილობამ და არავინ არ დაზიანდეს მაღალი ძაბვის გამო, ხდება შუქის დროებით გამორთვა, რაც წინასწარ არის შეთანხმებული, როგორც მთავრობასთან, ასევე ადგილობრივ მუნიციპალიტეტებთან,“ – აცხადებს ჰაიდარ ფარტენაძე.

29-30 მარტს ქედის მუნიციპალიტეტში, მახუნცეთის თემის სოფლებს – დოლოგანს, ზუნდაგას, ბზუბზუს, უჩხითს, ნამლისევს, მილისს, ჭალახმელას; ასევე სოფლებს – ზვარესა და წონიარისს; ხელვაჩაურის მუნიციპალიტეტში კი კაპანდიბსა და ვარშალომიძეებს არ მიეწოდებოდა შუქი. ჰაიდარ ფარტენაძის თქმით,  აღნიშნულ ტერიტორიებზე დღეს, 31 მარტსაც გაგრძელდება სამუშაოები, პირველი აპრილიდან კი სხვა სოფლებში დაიწყება სამუშაოები და იქ გაითიშება შუქი: „ძირითადად ქედისა და შუახევის მუნიციპალიტეტის სოფლებში. შუქის გამორთვა სოფლებში სამდღიან გრაფიკს არ გადასცდება, სააღდგომო დღეებში კი ელექტროენერგიის მიწოდებაში შეზღუდვები არ იქნება“.

მოსახლეობის თქმით, შუქს დაანონსებულ დროს არ რთავენ. მაგალითად, დილის 10 საათზე რომ შეწყდება შუქის მიწოდება, დაანონსებული საღამოს 6 საათის ნაცვლად ზოგან საღამოს 9 საათამდე არ ირთვება შუქი. აღნიშნულთან დაკავშირებით ჰაიდარ ფარტენაძე ამბობს: „დაანონსებულ დროზე ადრეც ხდება შუქის ჩართვა, შეიძლება ერთი ჭანჭიკის მიმაგრებას რამდენიმე წუთი დასჭირდეს და ამან განაპირობოს დაანონსებული სამუშაოების რამდენიმე წუთით გაგრძელება“.

220

220 კილოვოლტიანი ელექტროგადამცემი ხაზის მშენებლობა მაღალმთიან აჭარაში / ეკა ბარამიძის ფოტოები

ნეტგაზეთის მასალების სხვა გამოცემებში გადაბეჭდვის წესი
ავტორი