საკრებულოს წევრი: ხულოში სასწრაფოს ავტომობილები მწყობრიდანაა გამოსული


ხულოს მუნიციპალიტეტის საკრებულს წევრის,  ირაკლი ჯორბენაძის განცხადებით, სასწრაფო სამედიცინო დახმარების ხულოს ცენტრში მომუშავე ავტომობილები მწყობრიდანაა გამოსული. საკრებულოს წევრი ხელისფლებისგან დროულ რეაგირებას ითხოვს.

„სასწრაფო სამედიცინო დახმარების ავტომობილს, რომელიც შეაკეთეს და მთავრობის თავმჯდომარემ, ზურაბ პატარაძემ ექვსი თვის წინ ზარზეიმით ღორჯომში თვითონ აიყვანა, ერთი თვეც კი არ უმუშავია, მწყობრიდანაა გამოსული. დღეს ხულოში, სასწრაფო სამედიცინო დახმარების მხოლოდ ორი ავტომობილი მუშაობს, უჭირთ გამოძახების ადგილზე მისვლა. მოვითხოვთ, ხელისუფლებამ პიარის ნაცვლად საქმე აკეთოს“, – ამბობს საკრებულოს წევრი პარტია  „ერთიანი ნაციონალური მოძრაობიდან“  ირაკლი ჯორბენაძე.

სასწრაფო დახმარების ავტომობილებთან დაკავშირებით, ხულოს საკრებულოს წევრის განცხადებას ხულოს სასწრაფო სამედიციო დახმარების ცენტრის მენეჯერი დავით შავაძე უსაფუძვლოდ მიიჩნევს. ის ამბობს, რომ ცენტრში მომუშავე ყველა ავტომობილი გამართულია და შეუფერხებლად მუშაობს.

„ხულოს მუნიციპალიტეტს ოთხი ბრიგადა ემსახურება, ოთხი ავტომობილი გვაქვს და ოთხივე გამართულ მდგომარეობაშია, ავტომობილის გამო პრობლემები არ გვქონია,  შიგადაშიგ პატარა პრობლემები შესაძლოა გამოვლინდეს, თუმცა ადგილზე ვაგვარებთ. ღორჯომის ბრიგადის ავოტომობილი გასული წლის დეკემბრის თვეში დაზიანდა, შევაკეთეთ, დღეს შეფერხების გარეშე მუშაობს. ოთხი ავტომობილის გარდა რეზერვში ერთი ავტომობილი გვაქვს, უაზის ტიპის, რომელსაც საჭირების შემთხვევაში ვიყენებთ“ – ამბობს დავით შავაძე.

ხულოს სასწრაფო სამედიციო დახმარების ცენტრის მენეჯერის თქმით, ავტოპარკი ხულოში არც დამატებას საჭიროებს და არც განახლებას – „საუბარია ავტოპარკის განახლებაზე, თუმცა ჩვენი ავტოპარკი განახლებას არ საჭიროებს, რადგანაც ავტომობილები კარგ მდგომარეობაშია“.

ნეტგაზეთის მასალების სხვა გამოცემებში გადაბეჭდვის წესი
ავტორი