გაქირავებული ბინები ქედის სოციალურ სახლში

ქედის მუნიციპალიტეტის დაბაში, ეკნარას უბანში, 12- ბინიან სოციალურ სახლში ბინები, რომლებიც სოფელ ჯალაბაშვილებში მცხოვრებ პირველ კატეგორიაში მყოფ 12 ეკომიგრანტ ოჯახს სახელმწიფომ 2015 წელს სიმბოლურ ფასად გადასცა, ნაწილი ახლა გაქირავებულია, ნაწილი კი – დაგირავებული.

ქედის გამგებლის, დავით დუმბაძის თქმით, ხელისუფლებამ ბინები ორი წლის წინ ეკომიგრანტებს ხელშეკრულებით გადასცა, რომლითაც ეკომიგრანტები ვალდებულებას იღებდნენ, რომ ბინის მიღების შემთხვევაში ისინი სიცოცხლისთვის საშიშ საცხოვრებელ სახლებს დაშლიდნენ, თუმცა, ეკომიგრანტებმა სოფელ ჯალაბაშვილებში სახლები არ დაშალეს და უფრო მეტიც, ბევრი მათგანი დღეს სიცოცხლისთვის საშიშ სახლში აგრძელებს ცხოვრებას.

ეკომიგრანტებისთვის მოწყობილ სოციალურ სახლში 12 ბინიდან რამდენი ეკომიგრანტი ოჯახი ცხოვრობს დღეს და რამდენი დაუბრუნდა სოფელს, ზუსტ ინფორმაციას გამგეობა არ ფლობს. ქედის გამგებელი ამბობს, რომ თუ ეკომიგრანტები უახლოეს პერიოდში ყოფილ საცხოვრებლებს საკუთარი ნებით არ დაშლიან, სიცოცხლისთვის საშიში სახლების დასაშლელად გამგეობა კანონის ფარგლებში ალტერნატიულ გზას გამონახავს.

„ეს მათი საკუთრებაა, შეუძლიათ გააქირაონ, არის ფაქტები, რომ ქედაში მიღებული ბინა გააქირავა და რადგანაც ბათუმში მუშაობს იქ იქირავა, მაგრამ, არის ოჯახები, რომლებსაც სოციალურ სახლში არასდროს უცხოვრიათ და არც გაუქირავებიათ. ჩვენ, ამ 12-ბინიანი კორპუსით ორიენტირებული ვიყავით, რომ მოგვეგვარებინა ერთი სოფლის პრობლემა, მით უმეტეს, რომ გეოლოგიურ დასკვნით იქ ცხოვრება სიცოცხლისთვის საფრთხის შემცველია,” – ამბობს გამგებელი.

სოფელ ჯალაბაშვილებში მცხოვრები პირველი კატეგორიის ოჯახებისთვის, 12-ბიანიანი სოციალური სახლი ქედაში 2014 წელს მოეწყო – დაბა ქედაში, ყოფილი პოლიკლინიკის შენობა 12-ბინიან საცხოვრებელ სახლად „სოციალური სახლის“ პროგრამის ფარგლებში 2014 გარემონტდა და პირველ კატეგორიაში მცხოვრებ ოჯახებს 2015 წელს გადაეცა.

„ბათუმელების“ ინფორმაციით, 12-ბინიან სოციალურ სახლის ორ ბინაში სუს-ის თანამშრომლები ცხოვრობენ, ბინები მათ გირაოთი აქვთ აღებული.

ნეტგაზეთის მასალების სხვა გამოცემებში გადაბეჭდვის წესი
ავტორი